سمرقند۔ 16 ستمبر (اے پی پی) پاکستان و آذربائیجان ہڑتوم آ ملک آتا نیام اٹ سیاسی، اقتصادی، توانائی، دفاع، تعلیم و السی کہول آ رابطہ غاتون اوار چندی بشخ آتیٹی ہڑتوم آ کنڈآتا کمکاری ءِ ودفنگ نا عزم کرینو۔ وزیراعظم آفس نا میڈیا ونگ آن جاری بیان نار داٹ وزیراعظم محمد شہباز شریف جمعہ نادے آ سمرقند اٹی شنگھائی کمکار تنظیم نا سربراہان مملکت نا دیوان نا وخت آ آذربائیجان نا صدر الہام علیوف تون اوڑدہی کرے۔ وزیراعظم داوخت آ پاکستان تون کمکاری و یکجہتی اتون اوار اوار نوکاپ آن زہمی بندغ آتیکن است انا حب اٹ مالی امداد نا فراوانی آ آذربائیجان نا منت واری ءِ ہرفے۔ اوپارے کہ پاکستان ءِ مون تروک دا قدرتی آفت چاگڑدی بدلی تا سوب آن ءِ، دا جہانی خطرہ تون مون تننگ کن جہانی برادری دمدستی گام گیج کے۔ وزیراعظم پارے کہ پاکستان و آذربائیجان نا نیام اٹ بے مٹ تعلقداری ءِ ہرا اسیجائی تاریخ، عقیدہ و دودوربیدگ تون گنڈوک ءُ۔ وزیراعظم نگور نوکاراباخ آ پاکستان نا کنڈآن آذربائیجان نا اصولی مخ تفی نا درشانی ءِ کرسا اونا مقبوضہ علاقہ غاتے آجو کرفنگ اٹ تاریخی سرسہبی آ مبارکبادی تس۔ وزیراعظم آرمینیا نا بلااشتعال جلہو اٹی 71 آذری فوجی تا ساڑی آ شہادت آ ہم ہڑزخواہی نا درشانی ءِ کرے۔ وزیراعظم جہانی کانود نا رداٹ و اونا علاقائی سالمیت نا رکھ اٹی آذربائیجان نا تینا دفاع نا حق انا مخ تفی نا درشانی ءِ کرے۔ تینا ہڑتوم آ کنڈآتا تعلقداری تا جاچ ءِ ہلسا ہڑتوم آ راہشونک سیاسی، اقتصادی، توانائی، دفاع، تعلیم والس تون الس نا کہول آ رابطہ غاتون اوار چندی بشخ آتیٹی ہڑتوم آ کنڈآتا کمکاری ءِ ودفنگ نا عزم کریر۔ وزیراعظم واپار، زرکاری ، کشت وکشار، انفارمیشن ٹیکنالوجی و سیل و سوات نا بشخ آتیٹی ہڑتوم آ کنڈآتا تعلقداری نا ساڑی لائخی تے ودفنگ نا اہمیت آ زور شاغا۔ وزیراعظم آذربائیجان نا صدر ءِ دورہ پاکستان نا سلہ خلک۔ صدر الہام علیوف وزیراعظم ءِ زوت آذربائیجان نا دورہ نا سلہ ہم خلک۔
