اسلام آباد۔ 15 ستمبر (اے پی پی) مچ آ ملک اٹی بشام نا تباہ کن پِر و نوکاپ آن زوال کروک آتا جم کچ ودسا 1486 مس، تدوک آ 24 گھنٹہ ٹی پین 5 بندغ زوال کریر، پِر تا موسم نا بناآن داتم اسکان 12،749 بندغ ٹھپی مسنو۔ نیشنل ڈیزاسٹر مینجمنٹ اتھارٹی (این ڈی ایم اے ) معمول نا بنداو آ 24 گھنٹہ نا حالیت آتا رپورٹءِ جاری کرے ہراٹی ملک انا چندی بشخ آتیٹی مروک آ پِر تا سوب آن جم وڑاٹ جانی، ملکیت و بنداوی پنجر ءِ مروک آ نسخان تا جاچ ءِ پیش کننگانے۔ حوال نا رداٹ شنزہ ئی پِر و طوفانی نوکاپ نا سوب آن زہمی چندی علاقہ غاتیٹی مرک مسنے۔ بلوچستان اٹی قلعہ سیف اللہ ٹی اسہ نرینہ، نیاڑی و چناتا زوال کننگ وخت اس کہ خیبرپختونخوا (کے پی) نا ضلع کرم اٹی اسہ بندغ و چناسے نا زوال و اسٹ اسے نا ٹھپی مننگ نا حوال ءِ۔ تدوک آ 24 گھنٹہ ٹی اسلام آباد کیپٹل ٹیریٹری (آئی سی ٹی) ، گلگت بلتستان(جی بی) ، پنجاب، سندھ و آزاد جموں و کشمیر(اے جے کے) ٹی ہچ ءُ شکست یا نسخان اس متنے۔ حساب وکتاب نا رداٹ شنزہ ئی پِر تیان بلوچستان اٹی 300 کلومیٹر (کلومیٹر) سڑک آتے نسخان رسینگا وخت اس کہ 10،336 ساہدار کسکنو وخت اس کہ شنزہ ئی پِر تا واقعہ غاتیٹی 5،091 ہند آتے نسخان رسینگا ہرافتے ٹی 2،166 پورو وڑاٹ بھس و 2،925 ءِ جزوی نسخان رسینگا۔ داتم اسکان مروک آ جم نسخان تا رداٹ گلگت بلتستان و آزاد جموں و کشمیر تون اوار غٹ صوبہ غاتا چندی ضلع غاتیٹی شنزہ ئی پِر تا سوب آن کم وود 12،718 کلومیٹر سڑک، 390 پول و 1،760،372 ہند و 918،473 ساہدار تے نسخان رسینگانے۔ این ڈی ایم اے نا حوال اٹی پاننگانے کہ مچ آ ملک انا 81 ضلع غاتے آفت زدہ علاقہ غاتا وڑاٹ گوندنگا ہرافتے ٹی کم و ود 33،046،329 بندغ زہمی مسنو، چندی کمکی کارروائی تیٹی 179،281 بندغ ءِ بچفنگا و 546،288 بندغ کیمپ آتیٹی رہینگ انگ ءُ۔ نسخان تا کساس کن بلوچستان نا 30 ضلع غاتیٹی اسیجائی سروے نا بناءِ کننگا و سروے کن 32 ٹیم تعینات کننگانے۔ 25 ستمبر اسکان پورو مننگ نا گمان ءِ۔ گلگت بلتستان اٹی چار ٹیم تعینات کننگا ہرافک 12 ستمبر آن سروے نا بناءِ کریر و 20 ستمبر اسکان پورو مننگ نا گمان ءِ۔ پنجاب اٹی مسہ سروے ٹیم فیلڈ اٹی تعینات کننگا ہرافک 12 ستمبر آن سروے نا بناءِ کریر و 30 ستمبر اسکان پورو مننگ نا اومیت ءِ۔ خیبرپختونخوا ٹی ، کم و ود شش ٹیم سروے نا بناءِ کننگ کن ساڑی ءُ، ہرا 15 ستمبر آ بناکرے و 15 اکتوبرا سکان پورو کننگک ۔ سندھ اٹی سروے نا عملی وڑاٹ 25 ستمبر آن بنامننگ نا گمان ظاہر کننگانے۔
