اسلام آباد۔ 15 ستمبر (اے پی پی) بنجائی زیر اقتصادی امور سردار ایاز صادق پارینے کہ ملکی زرگزران نا سوگوی و مریس مدفائدہ غاتا رداٹ حکومت بھلا ڈیم تا تفنگ و بحالی آ چکار کننگ اٹی ءِ ہراڑآن دیر، خور و توانائی نا رکھ اکن ملک انا گرج آتے پورو کننگ اٹ کمک رسینگک۔ اوداہیت ءِ پنچ شنبے نادے آ داڑے دیر انا بشخ اٹی پیشن نا کمکاری آن چلینگوک آ ڈٹ آتا چاروکی کن جوڑ قومی رابطہ کمیٹی نا دیوان نا کماشی ءِ کرساپارے۔ دیوان اٹی بنجائی وزیر آبی وسیلہ سید خورشید احمد شاہ ، بنجائی وزیر ڈٹ بندی، شونداری و خصوصی گا گیج احسن اقبال، وزیر مملکت خزانہ ڈاکٹر عائشہ غوث پاشا، وزیراعظم آفس نا نمائندہ ، وزارت خزانہ و صوبائی پی اینڈ ڈی محکمہ و بورڈ آف ریونیو نا کمامدار آک بشخ ہلکر۔ دیوان اٹی ایشیئن انفراسٹرکچر انویسٹمنٹ بینک، امریکہ، فرانس، جرمنی، سعودی فنڈ، کویت، و اوایف آئی ڈی نا مالی کمکاری آن دیر انا بشخ انا شونداری ڈٹ آتیا پیش رفت نا جاچ ءِ ہلنگا۔ دیوان ءِ پاننگاکہ داوخت آ دیر انا بشخ اٹی درملکی کمکاری اٹ 3.354 ارب ڈالر مالیت نا 26 ڈٹ زیر عمل ءُ۔ بنجائی وزیر اقتصادی امور سردار ایاز صادق پن بجلی و دیر انا بشخ انا شونداری ڈٹ آتا اہمیت ءِ تالان کرے و پارے کہ اڑزآن نرخ آتیا بجلی نا پیدوار ملکی زرگزران نا پائیدار شونداری کن المی ءِ۔
