اسلام آباد۔ 15 ستمبر (اے پی پی) نیشنل فلڈر رسپانس کوآرڈنیشن کمیٹی (این ایف آرسی سی ) ملک انا چندی بشخ آتیٹی نوکاپ آن جانی و مالی نسخان ، ریسکیو و ریلیف آپریشن تا بابت تازہ حساب وکتاب جاری کرینے، نوکاپ آن تدوک آ 24 گھنٹہ ٹی انفراسٹرکچر ءِ ہچ ءُ نسخان اس رسینگتنے وخت اس کہ جم وڑاٹ 12 ہزار 718 کلومیٹر سڑک، 390 پول آتے نسخان رسینگا، ہر چار آ صوبہ غاتیٹی 23 ضلع زیات زہمی مسنو۔ این ایف آر سی سی نا رداٹ اینو ملک انا گیشتر بشخ آتیٹی موسم بنداوی وڑاٹ باسن و جمری سلک، بڑزکو پنجاب ، بڑزکو خیبرپختونخوا، آزاد کشمیر و گلگت بلتستان اٹی منہ ہند آتیا موسم جزوی وڑاٹ جمری مننگ نا گمان ءِ۔ بروک آ 24 گھنٹہ ٹی بڑزکو خیبرپختونخوا ، آزاد جموں و کشمیر ، گلگت بلتستان و کیبی مش تیٹی منہ ہند آتیا ہورہ و گروک اتون پِر انا گمان ءِ۔ تدوک آ 24 گھنٹہ ٹی سویل و دے ٹکی سندھ، بڑزکو خیبرپختونخوا و دے ٹکی پنجاب نا ایلو علاقہ غاتیٹی درمیانی پِر مس۔ تدوک آ دے زیات آن زیات درجہ حرارت تربت اٹی 42 ڈگری سینٹی گریڈ، سبی41 و نوکنڈی ٹی 40 سینٹی گریڈ ریکارڈ کننگا۔ تدوک آ 24 گھنٹہ ٹی انفراسٹرکچر ءِ ہچ ءُ نسخان اس رسینگتو۔ کل 12 ہزار 718 کلومیٹر سڑک، 390 پول آتے نسخان رسینگانے۔ سندھ انا غٹ آن زیات زہمی ضلع غاتیٹی قمبر شہداد کوٹ ، جیکب آباد، لاڑکانہ، خیرپور، دادو، نوشہروفیروز، ٹھٹھہ و بدین، بلوچستان اٹی کوئٹہ، نصیر آباد، جعفر آباد، جھل مگسی، بولان، صحبت پور و لسبیلہ، کے پی ٹی دیر ، سوات، چارسدہ، کوہستان ، ٹانک و ڈی آئی خان و پنجاب اٹی ڈی جی خان و راجن پور اوار ءُ۔ چندی علاقہ غاتیٹی اختہ مروک آ مخلوق ءِ کشنگ کن داتم اسکان 526 آرمی ایوی ایشن ہیلی کیپٹر جہاز چلیفنگا۔ تدوک آ 24 گھنٹہ ٹی 10 جہاز آتا کمک اٹ 34 اختہ مروک آ بندغ آتے کشنگا و 16.4 ٹن کمکی گڑا نوکاپ زہمی تسکان سرکننگا۔ داتم اسکان ہیلی کیپٹر نا کمک اٹ 4604 اختہ مروک بندغ آتے کشنگانے۔ داتم اسکان مچ آ ملک اٹی نوکاپ زہمی تیکن سندھ، سویلی پنجاب و بلوچستان اٹی 147 ریلیف کیمپ و 284 ریلیف کلیکشن پوائنٹ جوڑ کننگانے۔ داتم اسکان 8498.8 ٹن کنوئی آ گڑاتتون 1462.2 ٹن کنوئی آ گڑا و 78 لکھ 93 ہزار 30 دوائی جمع کننگانے وخت اس کہ 8219 ٹن خور، 1419.4 ٹن کنوئی آآ گڑا و 77 لکھ 54 ہزار 290 دوائی بشخنگانے۔ 300 آن زیات میڈیکل کیمپ خلنگانے ہرافتے ٹی مچ آ ملک اٹی اسہ لکھ 26 ہزار 365 ناجوڑ آتا درمان ءِ کننگانے و 3 آن 5 دے انا مفت دوائی فراوان کننگانے۔ پاکستان نیوی 04 فلڈ ریلیف سینٹر، 18 سینٹرل کلیکشن پوائنٹ جوڑ کرے۔ 16 ہزار 31 بندغ آتیکن 09 ٹینٹ سٹیز جوڑ کننگانے۔ چندی ضلع غاتیٹی 1462 ٹن راشن، 4896 ٹینٹ و 6 لکھ 20 ہزار 777 لیٹر منرل /ہنین ءُ دیر بشخنگا۔ پاکستان نیوی نا 23 ایمرجنسی رسپانس ٹیمک 54 موٹربوٹس و 2 ہوورکرافٹس آن شپ 10 ضلع غاتیٹی اختہ مروک 15 ہزار 174 بندغ آتے بچفے۔ پاک بحریہ سندھ اٹی 02 ہیلی کیپٹر جتا کرینے۔ داتم اسکان 59 جہاز آتیٹی 471 وار اختہ مروک مخلوق ءِ رکھ ہند آتسکان سرکننگا۔ 4631 پیکٹ راشن بشخا۔ پاک بحریہ نا 8 ڈائیونگ ٹیمک مچ آ پاکستان اٹی زہمی علاقہ غاتیٹی 27 ڈائیونگ آپریشن ہم کرینو۔ نوکاپ زدگان تیکن متحدہ عرب امارات، ترکی، چین، ازبکستان ، قطر، فرانس ، یونیسیف ، اقوام متحدہ نا پناہ گزین تا ادارہ (یواین ایچ سی آر) ، ترکمانستان ، اردن ، جہانی ادارہ خور، امریکہ، نیپال و سعودی عرب آن جہاز آک کمکی گڑااتسا پاکستان آ سرمسنو۔
