نوکاپ آن زہمی مخلوق نا مصیبت آتیان جوانی اٹ بلد، اوفتا آسودہی وبحالی کن ہرممکن کوشست کننگ اُن، پاک فضائیہ

کراچی۔ 14 ستمبر (اے پی پی) پاک فضائیہ پارینے کہ او ساڑی آ نوکاپ آن زہمی مخلوق نا مصیبت آتیان جوانی اٹ بلد ءِ و اوفتا آسودہی و بحالی کن ہرممکن کوشست کننگ ءِ۔ جاری اعلامیہ نا رداٹ پاک فضائیہ بلوچستان ، سندھ، خیبرپختونخوا و سویلی پنجاب نا نوکاپ زدہ علاقہ غاتیٹی پبی وڑاٹ کمکی کارروائی و ریسکیو نا عمل اٹی سول انتظامیہ نا کمک ءِ کرسا ریاستی ادارہ غاتے پین فعال کننگ اٹی ءِ۔ فضائیہ فیلڈ میڈیکل کیمپ ہم جوڑ کرینے ہراڑے ڈاکٹر و پیرامیڈیکل اسٹاف بیست ءُ چار گھنٹہ نوکاپ زہمی تے طبی آسراتی و مفت دوائی فراوان کننگ ءِ۔ اعلامیہ ٹی پاننگانے کہ کمکی کارروائی تیٹی پاک فضائیہ نا ایمرجنسی ریسپانس ٹیمک تیار کن و خور، خشک راشن و ایلو المی آ گڑا بشخار۔ تدوک آ 24 گھنٹہ ٹی اٹھال، لاکھڑا، مٹیاری، شہداد کوٹ، صحبت پور، قلعہ عبداللہ، فاضل پور، جھل مگسی، حاجی پور، بستی شیر محمد و بستی جاگیر گبول نا ضرورت مند آتیٹی 15 ہزار 719 تیار کن وخور نا پیکٹ، 507 دیر انا بوتل و 3 ہزار 415 خشک راشن نا پیکٹ بشخار۔ پاک فضائیہ نا ایمرجنسی رسپانس ٹیمک نوکاپ اٹی اختہ مخلوق نا حفاظت اٹ کشنگ اٹ پدریسہ لگوک ءُ، داکان بیدس فضائیہ نا میڈیکل ٹیمک 2 ہزار 416 ناجوڑ آتا طبی معائنہ ءِ ہم کریر۔ پاک فضائیہ نا پاننگ ءِ کہ او قدرتی آفت آتیٹی انسانی بنداو تیا امداد فراوان کننگ اٹ مدام لگوک  مسنو، ساڑی آ کمکی کارروائی گرج انا داساہت اٹی ہم وطن آتا کمک کن پاک فضائیہ نا عزم انا عملی وڑ ءِ۔