بنجائی وزیر خزانہ تون جرمن سفیر نا اوڑدہی، نوکاپ زدگان تا کمک کن پورو کمکاری نا پڑو

اسلام آباد۔ 14 ستمبر (اے پی پی) پاکستان و جرمنی واپار و زرکاری تون وار ہڑتوم آ کنڈآتا است خواہی نا غٹ بشخ آتیٹی کمکاری ءِ ودفنگ نا عزم انا درشانی ءِ کرینو وخت اس کہ جرمنی نوکاپ آن زہمی بندغ آتا امداد کن پاکستان ءِ پورو کمکاری نا باوری کرفینے۔ بنجائی وزیر خزانہ مفتاح اسماعیل تون چارشنبے نادے آ داڑے پاکستان اٹی جرمنی نا سفیر الفرڈ گراناز اوڑدہی کرے۔ بنجائی وزیر جرمن سفیر ءِ پاکستان اٹی پوسکن آ زمواری تے سنبھالنگ آ مبارکبادی تس و اوڑکن نیک است خواہی نا درشانی ءِ کرے۔ وزیر خزانہ پاکستان و جرمنی نا نیام اٹ ہڑتوم آ کنڈآتا تعلقداری تے مون آ تخا۔ اوپارے کہ پاکستان جرمنی تون تینا تعلقداری خاص وڑاٹ واپار، زرکاری و زرگزران نا بشخ آتیٹی کمکاری ءِ بھاز اہمیت ایتک۔ وزیرخزانہ ملک اٹی کاروبار و درملکی زرکاری ٹی ودکی کن ساڑی حکومت نا کنڈآن کروک آ گام گیج آتا بارواٹی ہم معلومدار کرے۔ اوپارے کہ حکومت ملک اٹی کاروبار و زرکاری کن سازگار چاگڑد اس تننگ ءِ و جرمنی نا زرکارآک پاکستان اٹی زرکاری نا وارخواہی تیان پبی فائدہ ہرفر۔ وزیرخزانہ جرمنی نا سفیر ءِ پاکستان اٹی بشام نا ساڑی آ پِر و نوکاپ آن  جانی و مالی نسخان تا بارواٹ ہم معلومدار کرے۔ جرمن سفیر وزیر خزانہ نا منت واری ءِ ہرفے۔ اوپاکستان تون چندی بشخ خاص وڑاٹ اقتصادی و واپاری تعلقداری تیٹی ودکی ٹی است خواہی ظاہر کرے۔ جرمنی نا سفیر ساڑی آ نوکاپ آن مروک آ جانی و مالی نسخان تیا است ہسونی و ہمدردی نا درشانی ءِ کرے۔ اوپارے کہ جرمنی  کمکی کارروائی تیٹی پاکستان تون پورو کمک فراوان کیک۔ اوڑدہی ٹی ہڑتوم آ کنڈآتا است خواہی نا امور آ گپ وتران کننگا و فریق آک چندی بشخ آتیٹی تعلقداری و کمکاری ءِ مون آ دننگ نا عزم انا درشانی ءِ کریر۔