جعلی ، غیر رجسٹرڈ دوائی بہاکروک آتا برخلاف ڈریپ ایکٹ نا رداٹ کارروائی کننگ انگ ءِ، بنجائی وزیر جان جوڑی

اسلام آباد۔ 14 ستمبر (اے پی پی) بنجائی وزیر جان جوڑی عبدالقادر پٹیل پارینے کہ مچ آ ملک آن جعلی ، غیر رجسٹرڈ و بے آب اٹ دوائی بہاکروک آتا برخلاف ڈریپ ایکٹ نا رداٹ کارروائی کننگ انگ ءِ۔ حکومت نا مقررہ نہاد آتیان زیات آ دوائی بہاکروک آتا برخلاف کانودی کارروائی کننگک۔ چارشنبے نادے آ تینا بیان اٹی اوپارے کہ الس تون بیدادی ءِ سگنگ پننگک۔ ہرازموارآک غیرکانودی کاریم تیٹی اوار خننگار اوفتا برخلاف سختی اٹ مون تننگک۔ اوپارے کہ جان جوڑی نا بشخ انا کارکڑد ءِ گچین جوڑ کننگ کن کوشست کننگ اُن و دا چرجوئی ٹی بھلو کچ اسے آ اصلاحات کننگ انگ ءِ۔ وزیر جان جوڑی نا پارت آ دوائی تا زیات نہاد آتا برخلاف ملک گیر کریک ڈاؤن برجاءِ۔ پیناڈول نا کوڑی کننگ نا برخلاف ڈریپ بھلو کارروائی اس کرے۔ دا بابت وزارت جان جوڑی نا کمامدار آک پاریر کہ ڈریپ انا ٹیم کراچی کچی گلی میڈیسن مارکیٹ اٹی الطاف ٹریڈر آ چھاپہ ٹی کم و ود 2 لکھ 52 ہزار پیناڈول نا گولی دوئی کرے۔ اوپارے کہ  کوڑی کننگ نا سوب آن مارکیٹ آن دا دوائی نا مصنوعی کاختی ودی مسوسس۔ اوپارے کہ فارمیسی آن غیر وارنٹی مروک سٹاک دوئی مس ہرا شکبر مننگ کیک ہرافتے ڈریپ انا ٹیم کوزہ ٹی ہلکونے۔ اوپارے کہ دا رداٹ ہلوک آ ٹیسٹ آتا وڑانا بنائی رپورٹ ءِ پیش کننگانے۔