سعودی سفیر نا وزیراعلیٰ سندھ اتون اوڑدہی، نوکاپ زہمی تا ہرممکن کمک نا باورکرفے

 کراچی۔ 14 ستمبر (اے پی پی) سعودی عرب نا سفیر نواف بن سید المالکی کراچی ٹی وزیراعلیٰ سندھ سید مراد علی شاہ تون اوڑدہی کرے و تینا ملک انا کنڈآن صوبہ ٹی نوکاپ زہمی تا ہرممکن کمک نا باوری کرفے، اونوکاپ نا سوب آن جانی نسخان آ وزیراعلیٰ تون است ہسونی نا درشانی ءِ ہم کرے۔ وزیراعلیٰ ہاؤس آن جاری اعلامیہ نا رداٹ نواف المالکی پارے کہ اونا ملک سندھ اٹی نوکاپ زہمی تا ہرممکن کمک ءِ کیک۔ اونوکاپ نا سوب آن جانی نسخان تیا وزیراعلیٰ سندھ اتون ہڑزخواہی نا درشانی ءِ ہم کرے۔ سفیر وزیراعلیٰ ءِ پارے کہ اونا ملک انا کنڈآن 90 ٹن ریلیف نا گڑا گدریفنگ انگ ءِ ہراڑآ وزیراعلیٰ سعودی حکومت نا منت واری ءِ ہرفے۔ وزیراعلیٰ سعودی سفیر ءِ سندھ اٹی مروک آ بھسکاری تا بابت بریف کرے۔ اوپارے کہ نوکاپ آن زہمی علاقہ غاتیٹی ریلیف نا کاریم داسہ ہم برجاءِ، اسہ علاقہ ءِ بچفنہ تو ایلو ڈبنگک۔ اوپارے کہ پڈعیدن اٹی عام وڑاٹ 60 ملی میٹر پِر مریک وخت اس کہ اگست اٹی 1763 ملی میٹر پِر مس، ہندا وڑ ہر شاراٹی ترند پِر مس۔ سعودی سفیر پارے کہ سعودی عرب دا مشکل وخت اٹی سندھ انا الس تون تفوک ءِ۔