الس ءِ اڑزآن بجلی فراوان کننگ نا بنداو ءِ تخنگانے، بنجائی وزیر بجلی خرم دستگیر خان

اسلام آباد۔ 14 ستمبر (اے پی پی) بنجائی وزیر بجلی خرم دستگیر خان پارینے کہ الس ءِ اڑزآن بجلی فراوان کننگ نا بنداو ءِ تخنگانے، ملکی و درملکی زرکار آک شمسی توانائی نا ڈٹ آتیٹی زرکاری ٹی پبی است خواہی نا درشانی ءِ کرینو، 600 میگاواٹ نا اولیکو ڈٹ آ زرکار آتے حوال تننگ انگ ءِ، شمسی توانائی آن چاگڑدی کچٹی ٹی کمتی بریک، شمسی توانائی نا ڈٹ انا نہاد نا تعین ءِ شفاف وڑٹ کننگک، مچ آ ملک اٹی خلقی علاقہ غاتیٹی 1 آن 4 میگاواٹ نا شمسی توانائی نا ڈٹ خلنگک، سرکاری ماڑی تے ہم سولر توانائی آ گدریفنگک، بزغرآتے شمسی توانائی آ چلینگوک آ ٹیوب ویل فراوان کننگک، سرکاری ماڑی تے ہم سولر توانائی آ گدریفنگک، جہانی مارکیٹ اٹی اینخو سال نا بناآن کولا، تیل و گیس انا نہاد آتیٹی 300 آن 400 درسد نا ودکی مسنے، آخبت بجلی نا پیدوار آ ہچ ءُ ڈٹ اس درآمدی ایندھن آ لگپک۔ چارشنبے نادے آ پریس کانفرنس آن تران کرسا اوپارے کہ وزیراعظم شہباز شریف نا کماشی ٹی اڑزآن بجلی نا فراوانی نا بنداو ءِ تخنگ انگ ءِ۔ شمسی توانائی نا دا اولیکو سلاہ ئی ڈٹ ترند رفتاری اٹ پورو مریک، داڑکن زرکار آتے سلہ خلنگانے۔ بجلی نا نہاد آتے کم کننگ نا عملی کاریم نا بنا اینو مننگ اٹی ءِ۔ شمسی توانائی آن 60 درسد اڑزآن بجلی جوڑ کننگ مریک۔ شمسی توانائی آن چاگڑدی کچی ٹی کمتی واقع مریک۔ دا ڈٹ انا بابت زرکارآتے حوال تننگک۔ شمسی توانائی نا دا ڈٹ انا نہاد نا تعین ءِ شفاف وڑاٹ کننگک۔ اوپارے کہ حکومت نا توانائی پالیسی نا رداٹ بجلی ودی کننگ نا پوسکن آ کارخانہ غاتے ملکی وسیلہ غاتیان خلنگک۔ پن بجلی، شمسی توانائی، تہو آن بجلی ودی کننگ، تھرکول و جوہری توانائی نا ڈٹ ہی خلنگک انتئے کہ بجلی جوڑ کننگ کن درآمد مروک  ایندھن بھاز کبین تمک۔ اوپارے کہ جہانی مارکیٹ اٹی اینخو نا سال انا بناآن کولا، تیل و گیس انا نہاد آتیٹی 300 آن 400 درسد نا ودکی مسنے، داخہ زیات نہاد ءِ پاکستانی صارف آک سگنگ کپسہ۔