مولانا فضل الرحمان نا سوات و ٹانک اٹی جے یو آئی راہشون تیا جلہو آتا مذمت

اسلام آباد۔ 14 ستمبر (اے پی پی) جمعیت علمائے اسلام (ف) نا سروک مولانا فضل الرحمان سوات و ٹانک اٹی جے یو آئی راہشون تیا مروک آ جلہو آتا ترندی اٹ مذمت ءِ کرسا پارینے کہ ملک دشمن واکدار آک اسہ وار ولدا جے یوآئی راہشون تے شست کننگ نا بناءِ کرینو، جے یو آئی راہشون تا ٹارگٹ کلنگ لمحہ فکریہ ءِ۔ چارشنبے نادے آ جمعیت علمائے اسلام نا آفیشل ٹویٹر اکاؤنٹ آن جاری ٹویٹ نا رداٹ مولانا فضل الرحمان پارے کہ امن نا است خواہی ءِ نزوری تکنگپ، ہڑدے راہشون تیا جلہو مننگ ءِ ولے داسکان اسہ دوبہ دار اسے ہم دزگیر کننگتنے۔ اوپارے کہ وزیرستان و باجوڑ آن پد ٹانک و سوات اٹی ہم دہشت گردی قابل مذمت ءِ۔ داوڑنا واقعہ غاک آخبت اٹ ملک انا امن و ایمنی کن بھسکاری نا سوب مننگ کیرہ۔ اودعاکرے کہ اللہ کریم ایماندار تا بخشش  ءِ کے و اوفتا قربانی تے قبول کے۔ اوپارے کہ دا جلہو آتیٹی شہید مروک آ نہادی جان تا خاہوت آتون است ہسونی نا درشانی ءِ کیوہ، جلہو آتیٹی ٹھپی مروک آتے اللہ کریم زوت دراخ جوڑ کے۔