صحبت پور۔ 14 ستمبر (اے پی پی) وزیراعظم محمد شہباز شریف بلوچستان نا نوکاپ آن زہمی علاقہ صحبت پور اٹی اِرا تُو اٹی پوسکن ءُ ماڈل اسکول اسے نا جوڑ کننگ نا پڑو ءِ کرسا پارینے کہ دا اسکول اٹی خوانوک آ طالب علم آتے غٹ پوسکن آ آسراتیک ملرہ، اوفتے ٹیبلٹ تننگک، دانا غٹ خڑچہ ءِ بنجائی حکومت سگک، داچناک ننا گمر مریرہ۔ چارشنبے نادے آ نوکاپ آن زہمی علاقہ صحبت پور نا دورہ نا وخت آ وزیراعظم شہباز شریف کیمپ اٹی جوڑ اسکول نا چناتتون ملا، وزیراعظم چناتیان قومی ترانہ ءِ بِنگ و خت اس کہ چناک اودے نظم اس ہم بنفیر۔ وزیراعظم چناتے شاباش ترساپارے کہ او خواری اٹ تعلیم دوئی کیر، دیر انا شیف مننگ آن پد اوفتے زوت تینا اُراتیٹی آباد کننگک، اوفتا لمہ و باوہ غاتا فصل آتے ملوک آ نسخان نا معاوضہ ایتنہ، زہمی خاہوت آتے 25 ہزار روپئی فی خاہوت نغدی فراوان کرینن، زہمی علاقہ غاتیٹی جوان ءُ اسکول و ہسپتال جوڑ کینہ، زہمی تے تنیا الیپنہ، بنجائی و صوبائی حکومت آک غٹ ادارہ غاتون اواری اٹ پبی کمک کینہ۔ اوپارے کہ زہمی علاقہ غاتیان دیر کشنگ کن کمامدار آتے خصوصی پارت جاری کننگانے۔ اوپارے کہ مسنک ننا آخبت آک ءُ ، او بھلن مرسا قوم انا گمر مریرہ۔ وزیراعظم تعلقدار کمامدار آتے پارت کرے کہ دا چناتیکن اسہ پوسکن ءُ ماڈل اس جوڑ کننگے ہرانا غٹ خڑچ آتے بنجائی حکومت ہرفک۔ دا اسکول کن گچین اتاد آتا خذمت ءِ ہلنگک، داڑے خوانوک آ چناتے کتاب و یونیفارم مفت تننگک وخت اس کہ اوفتے ٹیبلیٹ ہم فراوان کننگک۔ داوخت آ وزیراعظم محمد شہباز شریف زہمی تیکن جوڑ کیمپ اٹی طبی آسراتی تا جاچ ءِ ہلک۔ میڈیکل کیمپ اٹی ساڑی پیرامیڈیکل اسٹاف وزیراعظم ءِ طبی آسراتی تا بابت معلومدار کرے۔ وزیراعظم شہباز شریف زہمی تتون اوڑدہی کرے و اوفتا ویل آتے اوفتیان اَریفے۔ وزیراعظم تعلقدار کمامدارآتے پارت کرے کہ داعلاقہ غاتیٹی انٹرنیٹ نا آسراتی بحال مننگ آ بروک آ 24 گھنٹہ ٹی غٹ زہمی تے 25 ہزار روپئی فی خاہوت نغد زر تننگے۔
