صحبت پور۔ 14 اگست (اے پی پی) وزیراعظم محمد شہباز شریف نوکاپ آن زہمی علاقہ غاتا 22 لکھ اُرائی و 3 نیم لکھ کمرشل صارف آتا بجلی نا اگست و ستمبر تُو انا بل آتے معاف کننگ نا پڑو کرسا پارینے کہ نن ملک ءِ ڈیفالٹ آن بچفنگ کن مشکل فیصلہ کرسا سیاست نا جاگہ غا نن ریاست ءِ بچفین، 300 یونٹ اسکان بجلی نا اِرا کروڑ 10 لکھ صارف آتے ستمبر اٹی ہم فیول پرائس ایڈجسٹمنٹ ءِ ہلپنہ۔ چارشنبے نا دے آ صحبت پور بلوچستان اٹی میڈیا تون گپ وتران کرسا وزیراعظم پارے کہ نوکاپ آن صوبہ سندھ و بلوچستان اٹی بھلو کچ اسے آ بھسکاری مس ، بنجائی حکومت نا کنڈآن نوکاپ زہمی تیکن 70 ارب روپئی نغد زر انا دروشم اٹ بشخنگ انگ ءِ ، داتم اسکان 24 ارب روپئی بشخنگانے، بے نظیر انکم سپورٹ پروگرام نا رداٹ 25 ہزار روپئی ہر اُراءِ بشخنگ انگ ءِ ، گڑاس علاقہ غاتیٹی انٹرنیٹ و بجلی نا نظام درہم برہم مننگ آن دازرانا بشخنگ اٹ تعطل ءِ او فتے ہم زوت مر کینہ۔ اوپارے کہ زہمی علاقہ غاتا ہُشار چناتا تعلیمی خڑچ مننگ کن اِلیپنہ۔ وزیراعظم پارے کہ نوکا پ نا بھسکاری داخہ در زیات ءِ کہ ہر خن خڑینکی ءِ و مچ آ قوم اواری اٹ دانا مقابلہ ءِ کننگ اٹی ءِ۔ وزیراعظم پارے کہ حکومت بھاز مشکل حالیت و میرات اٹی ملوک آ زرگزرانی مشکل آتیان پد ہم مشکل ءُ فیصلہ کرسا پاکستان ءِ ڈیفالٹ مننگ آن بچفے، سیاست ولدا ہم مرسا کیک نن ریاست ءِ بچفین۔ اوپارے کہ بنجائی و صوبائی حکومت آک، قومی و صوبائی ادارہ غاک، انتظامیہ غٹ اواری اٹ نوکاپ آن زہمی علاقہ غاتیٹی کاریم کننگ اٹی ءُ دانا بھسکاری بھاز زیات ءِ ولے انسانی حداسکان ہراخہ در مننگ کرے زہمی تا کمک ءِ کینہ۔ اوتعلقدار کمامدار آتے پارت کرے کہ او زہمی علاقہ گاتیٹی سلوک دیر تے کشنگ کن زیات مشینری تے خلیر ، کنوئی آ دیر انا مفننگ بھلو چیلنج اسے ہراڑآن ناجوڑیک ترندی اٹ تالان مننگ ءُ، این ڈی ایم اے دیر انا ٹینکی تا فراوانی کن گام گیج کرینے ولے زہمی تے منرل واٹر نا فراوانی ءِ پک کننگک ہرانا اِرا ٹرک اینو وخت اس کہ 10 ٹرک بروک آ 2 دے تیٹی سرمریک، کنوئی آ دیر انا فراوانی شاہراہ تتون اوار اوار ہیلی کیپٹر آتا کمک اٹ ہم ممکن کینہ داڑکن انت کہ وسیلہ اس درکار مس اوفتے ایتنہ۔ اوپارے کہ زہمی علاقہ غاتیٹی سڑک آتا بحالی نا کاریم ترندی اٹ برجاءِ، زہمی تے مشکل وخت آن کشنگ کن پبی کوشست کننگ اُن۔ وزیراعظم داوخت آ زہمی علاقہ غاتا بجلی نا اُرائی و کمرشل صارف آتا اگست و ستمبر نا بل آتے معاف کننگ نا پڑو کرے، داڑآن 24 ءُ نیم لکھ صارف آتے 10 ارب روپئی نا ریلیف تننگک۔ اوپارے کہ 3 کروڑ 10 لکھ صارف آتے فیول پرائس ایڈجسٹمنٹ نا چھوٹ تننگاسس ہراڑآن 75 درسد صارف فائدہ ہرفیسر اوفتے کن ستمبر نا بجلی نا بل آتیا ہم دا آسراتی ءِ تننگ انگ ءِ۔ اوپارے کہ نوکاپ آن زہمی علاقہ غاتیٹی انفراسٹرکچر نا بحالی نا ریسہ ءِ ہم بروئی ءِ، فصل آتے ملوک آ نسخان تا پوروی کن صوبہ غاتون اواری اٹ حکمت عملی اس جوڑ کینہ۔ اووزیراعلیٰ و چیف سیکرٹری بلوچستان ءِ شاباشی ترسا پارے کہ غٹ بنجائی و صوبائی وزیر آک و گچین مروک نمائندہ غاک مشکل نا داساہت اٹی ڈکھیاانسانیت نا خذمت نا جوزہ نا رداٹ زہمی تا دوتے ہلیر ، سیاسی اختلاف آتے اینک کرسا زہمی تا کمک ءِ کیر۔ وزیراعظم داوخت آ ضلع صحبت پور اٹی فلڈ ریلیف کیمپ انا دورہ ءِ کرے وخت اس کہ ہموڑے جوڑ اسکول آ ہم ہنا۔
