صحبت پور۔ 14 ستمبر (اے پی پی) وزیراعظم محمد شہباز شریف نوکاپ آن زہمی علاقہ صحبت پور اٹی کمکی کاریم تے پین ترند کننگ نا پارت کرسا پارینے کہ زہمی علاقہ غاتیان دیر تے کشنگ نا کاریم ءِ زیات ترندی اٹ کننگے، زہمی علاقہ غاتیٹی کنوئی ءُ ساف دیر دمدستی سرکینہ، نوکاپ آ سیاست کپنہ۔ چارشنبے نادے آ وزیراعظم بلوچستان نا نوکاپ آن زہمی علاقہ صحبت پور نا دورہ ءِ کرے ہراڑے اودے نوکاپ نا بھسکاری ، زہمی تا کمک و تباہ مروک انفراسٹرکچر نا بحالی کن برجاکوشست آتیان معلومدار کننگا۔ وزیراعظم ءِ پاننگا کہ صحبت پور بلوچستان اٹی نوکاپ آن غٹ آن زیات زہمی مسنے داڑے نسخان تا اسیجائی سروے ءِ زوت پورو کننگک، زہمی خاہوت آتے 25 ہزار روپئی فی خاہوت بے نظیر انکم سپورٹ پروگرام نا رداٹ تننگ انگ ءِ، داتم اسکان اسہ لکھ 66 ہزار خاہوت آتے دا زر ءِ تننگانے، زہمی تے اِرا لکھ 50 ہزار مچھر دانی فراوان کننگانے وخت اس کہ دونیم لکھ پین فراوان کینہ، داکان بیدس تمبو تا فراوانی نا کاریم ہم برجاءِ۔ وزیراعظم ءِ پاننگاکہ دا علاقہ ٹی 122 کیمپ جوڑ کننگانے، میڈیکل کیمپ آتیٹی 4 لکھ آن زیات ناجوڑ آتے درمان نا آسراتی فراوان کننگا، پیناڈول و ملیریا نا دوائی ساڑی ءِ داڑے دُوشہ کُننگ آن اِرا بندغ زوال کریر ولے اونا مون ءِ توننگانے، پڈ پُر آ زالبول آتا رجسٹریشن برجاءِ، میڈیکل کیمپ اٹی گائناکالوجسٹ تون اوار ایلو تعلقدار عملہ ساڑی ءِ، ہندی ایم پی اے وزیراعظم نا ستاءِ کرسا پارے کہ داڑے مخلوق نا اُرا و کشت و کشار بھس مسنو، شار آن دِیر ءِ کشنگ نا بست وبند کننگے۔ اوپارے کہ دا قدرتی آفت بھاز بھلن ءِ، داٹی بحالی نا بابت مشکل ہم بھاز ارے۔ وزیراعظم ءِ پاننگاکہ ہلہلہ ئی کمکی کاریم تیکن بنجاغان پین کمک نا گرج ءِ، خلقی علاقہ غاتیٹی انٹرنیٹ نا بحالی نا بابت گڑاس مشکلات ءِ ولے شاری علاقہ غاتیٹی انٹرنیٹ ءِ بحال کننگانے۔ وزیراعظم داخت آ زہمی تا بحالی کن کمکی کاریم تے ترند کننگ نا پارت کرسا پارے کہ بنجاغان پین فنڈ درکارءِ تو معلومدار کننگے، نن نوکاپ آ سیاست کپنہ، دااسہ امتحان اسے، نوکاپی دیر انا بابت داکان بھلو آفت مستین اٹی خنتنون، داڑآ صبر آن کاریم ہلوئی مریک، حکومتی مشینری دمدستی وڑاٹ فعال ءِ، صحبت پور غٹ آن زیات زہمی مسنے، کنوئی آ ساف دیر انا کاختی نا نوٹس ءِ ہلسا وزیراعظم پارے کہ دمدستی وڑاٹ ہیلی کیپٹر نا کمک اٹ دیر انا بوتل تننگک۔ اوکمامدار آتے پارت کرے کہ کنوئی آ دیر انا مفننگ نا غاو بف۔ وزیراعظم پارے کہ پین تمبو نا آرڈر تننگانے داتمبو تے بلوچستان آن نوکاپ آن زہمی علاقہ غاتیٹی تننگک، زہمی علاقہ غاتیٹی دینی مرض تالان مننگ ءِ اوفتے کنٹرول کننگ المی ءِ۔
