اسلام آباد۔ 13 ستمبر (اے پی پی) بین الپارلیمانی یونین نا صدر ورٹے پچیکو پارینے کہ موسمیاتی بدلی تیٹی پاکستان نا کڑد بھاز کم ءِ ولے پاکستان اٹی ساڑی آ تباہ کن نوکاپ نا سوب ہندا موسمیاتی بدلیک ءُ، ہرا شون ہلوک ملک آتا چاگڑدی بدلی تیٹی بھلو بشخ اسے اوفک مشکل نا دا ساہت اٹی پاکستان نا کمک کن مون آ بریر، ایس ڈی جیز ہدف آتا دوئی کننگ کن ننے پگہ نا جاگہ غا اینو عملدرآمد نا پالیسی ءِ تینا کروئی مریک، الس ءِ تعلیم نا آسراتی ، نیزگاری و بے بریبری نا چٹفنگ و گچین آخبت کن ایس ڈی جیز آ عملدرآمد بھاز اہم ءِ۔ او سے شنبےنادے آ پارلیمنٹ ہاؤس اٹی پائیدار شونداری ہدف (ایس ڈی جیز) کن ایشیا پیسفک ملک آتا بین الپارلیمانی یونین نا مسٹ میکو علاقائی سیمینار آن تران کریکہ۔ داوخت آ سپیکر قومی اسمبلی راجہ پرویز اشرف ، کنوینر پارلیمانی ٹاسک فورس رومینہ خورشید عالم ئسک ہم تران کریر۔ بین الپارلیمانی یونین نا صدر پاکستان اٹی نوکاپ نا حالیت آتیان پد ہم آئی پی یو سیمینار نا اڈتننگ آ اسپیکر قومی اسمبلی و پاکستان نا منت واری ءِ ہرفے۔ اوپارے کہ ایس ڈی جیز غٹ انسانیت کن اہم ءِ داوخت آ پاکستان ءِ نوکاپ نا دروشم اٹ بھلو قدرتی آفت اس مون تروک ءِ، نن داڑآ پاکستان تون یکجہتی و ہمدردی نا درشانی ءِ کینہ، داخہ در بھلو کچ اسے آ قدرتی آفت خنتنون ہراٹی کروڑ آ انسانک زہمی مسنو، ہزار آمرک مس، کروڑ آ بندغ آک بے اُرا مسنو، لکھ آ اُراک بھس مسنو، فصل آتے نسخان رسینگا، زرگزران بھس مس۔ اوپارے کہ دا غٹ موسمیاتی بدلی تا نتیجہ ءِ ، مچ آ دنیا ٹی الس موسمیاتی بدلی تا گواچی مننگ ءِ ، شون ہلوک ملک آک خاص وڑاٹ نوکاپ نا دا حالیت آتیان پیش تمنگ کن پبی کمک کیر، موسمیاتی بدلی تیٹی پاکستان نا کڑد بھاز کم ءِ، اونا نسبت شون ہلوک ملک آتا موسمیاتی بدلی تیٹی بھلو دُو اسے ، اومون آ برسا پاکستان نا کمک ءِ کیر، داکان بیدس موسمیاتی بدلی تا بابت آن ہم اوفتے کڑد ادا کروئی مریک۔ اوایس ڈی جیز نا اہمیت ءِ مون آ تخسا پارے کہ پاکستا ن نا کنڈآن دا ہدف آتا ہڑدے ئی بنداو آ چاروکی کن پارلیمانی ٹاسک فورس انا جوڑ کننگ جوان ءُ گام اسے۔ اوپارے کہ ننا چاگڑد ننا تینا آخبت کن ءِ ننے اونا رکھ ءِ کروئی ءِ ، دانا اثرآتیان خلاسی دوئی کروئی ءِ اگہ دافتے توننگ تو تو دا مچ آ دنیا ءِ تینا پلویڑ اٹی ہلنگ کیک۔ اوپارے کہ تعلیم، جان جوڑی و زرگزران نا گچینی کن ہزاریہ شونداری ہدف اہم ءِ، نیزگاری، بے بریبری، گچین دنیا و خوشی کن ایس ڈی جیز اہم ءِ۔ اوپارے کہ نن الس نا نمائندہ اُن او تینا ویل آتا ایسری کن ننا کنڈآ ہُننگ ءُ۔ موسمیاتی بدلی تتون مون تننگ کن ننے دمدستی گام گیج کننگ نا گرج ءِ ننے اسہ ایلو تون اواری اٹ کاریم کروئی ءِ، تینا آزموندہ غاتیان اسہ ایلو ءِ فائدہ تروئی ءِ۔ اوپارے کہ داکان ہراتم نن تینا ملک آتیاکان تو ایس ڈی جیز نا ہدف آتیا عملدرآمد کن پبی کڑد ادا کین، دا ننا حکومت آتا بجٹ نا منظوری و اولیت آتیٹی اولین حیثیت نا بایدے حامل مرے۔
