وزیراعظم نا کماشی ٹی بنجائی کابینہ نا دیوان، معاہدہ تخپروک آ ملک آتا کنڈآن اسیجائی کانودی کمک نا درخواست آتے قبول کننگ نا سمری منظور

اسلام آباد۔ 13 ستمبر (اے پی پی) بنجائی کابینہ پاکستان تون کانودی کمک نا بابت نوشتہی معاہدہ تخپروک آ ملک آتا کنڈآن اسیجائی کانودی کمک نا درخواست آتے امنا کننگ نا وزارت داخلہ نا سمری ءِ منظور کرے وخت اس کہ وزیراعظم وزارت خزانہ و اسٹیٹ بینک آف پاکستان ءِ پارت کرینے کہ حاجی تا اوور بکنگ نا بابت بینک آتیان دا ضرور اَریفنگے کہ اوفک دا باندات اٹی لاپرواہی اٹ کاریم انت اکن ہلکر، داکان بیدس زہمی نوکاپ کن این ڈی ایم اے ءِ 3 ارب روپئی نا فراوانی نا منظوری ءِ ہم تننگانے۔ وزیراعظم آفس میڈیا ونگ انا رداٹ وزیراعظم شہباز شریف نا کماشی ٹی بنجائی کابینہ نا دیوان سے شنبے نادے آ اسلام آباد اٹی اڈ ہلک۔ وزیراعظم غٹ کابینہ باسک آتے بخیر اٹ پارے۔ بنجائی کابینہ نا دیوان اٹی حکومتی کوٹہ غا حاجی تا اووربکنگ نا باندات نا انکوائری رپورٹ آ شرہ مس۔ دا باندات آ ٹہیفوک آ کمیٹی ٹی وزارت خزانہ، وزارت مذہبی امور و اسٹیٹ بینک انا نمائندہ غاک اوار ئسر۔ دیوان ءِ پاننگاکہ اووربکنگ نا باندات اٹی مفاہمت نا ویل ئسر و ہچ وڑنا بدنیتی نا شاہدی ملیتو۔ ہرابینک آتا کنڈآن حاجی تا حکومتی کوٹہ غا اووربکنگ کننگاسس۔ دا بینک آتا کنڈآن حاجی تے معاوضہ نا زر تننگانے۔ وزیراعظم وزارت خزانہ و اسٹیٹ بینک ءِ دا پارت کرے کہ دا بینک آتیان دا ضرور اَریفنگے کہ او داباندات آتیٹی لاپرواہی اٹ کاریم انت اکن ہلکر۔ وزیراعظم نوکاپ زدہ علاقہ غاتیٹی بینک آتے تینا کاریم ءِ چھٹی نا دے آ ہم برجا تخنگ کن اسٹیٹ بینک آف پاکستان ءِ پارت جاری کرے۔ بنجائی کابینہ ہمو ملک آک ہرافتے تون پاکستان نا کانودی کمک نا بابت ہچ ءُ نوشتہی معاہدہ اس اف نا کنڈآن اسیجائی کانودی کمک نا درخواست آتے امنا کننگ نا وزارت داخلہ نا سمری ءِ منظور کرے۔ بنجائی کابینہ وزارت نیشنل ہیلتھ سروسز، ریگولیشنز اینڈ کوآرڈنیشن نا کنڈآن 10 دوائی تیا ریٹیل پرائس ءِ ودفنگ نا سمری ءِ مسترد کرے۔ وزیراعظم پارے کہ ای دوائی تا نہاد آتیٹی ودکی نا اسُل مخ تف ءِ کپرہ۔ بنجائی کابینہ وزارت سائنس و ٹیکنالوجی نا سفارش آ بجلی آن چلینگوک آ پنکھاغاتیکن کم آن کم انرجی پرفارمنس سٹینڈرڈ نا معیاد اٹی 30 جون 2023 اسکان ودکی نا منظوری ءِ تس۔ ولے وزیراعظم وزارت سائنس و ٹیکنالوجی ءِ پارت کرے کہ دابابت 30 جون 2023 آن اول کم آن کم انرجی پرفارمنس سٹینڈرڈ ءِ گچین کوالٹی آ اتنگ نا پبی کوشست کننگے۔ بنجائی کابینہ کمیٹی لیجیسلیٹو کیس آتا 2 ستمبر 2022 نا دیوان اٹی کروک آ فیصلہ غاتے پک کرے۔ ہرافتے ٹی بائیو سٹڈی رولز 2017 نا رول 13 ٹی ترمیم نا منظوری، امیگریشن آرڈیننس نا سیکشن 15 ٹی ترمیم نا منظوری، گیس دُزی نا توننگ و وصولی ایکٹ 2016 ٹی ترمیم آتا منظوری، ایوکیوٹرسٹ پراپرٹی بورڈ انا سیکرٹری نا آسامی آ سروس رولز اٹی ترمیم آتا منظوری، سولر ازباب، الیکٹرک موٹرز، پاور ٹرانسفارمر آتے پاکستان سٹینڈرڈ وکوالٹی کنٹرول اتھارٹی ٹی اواری اوار ءِ۔ بنجائی کابینہ اقتصادی رابطہ کمیٹی ای سی سی نا 8 ستمبر نا دیوان اٹی کروک آ فیصلہ غاتے پک کرے ہرافتے ٹی یوٹیلیٹی اسٹورز زہمی نوکاپ نا المی کنوئی آ گڑاتا ہلنگ نا 54 کروڑ روپئی نا منظوری، پاسکو نا ایجنسی تا نیام اٹ ہندی و درآمد مروک خولم نا کوڑی نا تخصیص نا منظوری، اوغانستان اٹی مسہ پاکستانی ہسپتال آتیٹی ازباب آتا ہلنگ، تنخواہ و فعالیت کن زر انا گدریفنگ نا منظوری، نوکاپ زہمی تے ریلیف نا فراوانی کن این ڈی ایم اے ءِ 3 ارب روپئی نا منظوری اوار ءِ۔ وزیراعظم ملک اٹی خولم نا نہاد انا تعین و یوریا نا بشخنگ نا بابت صوبہ غاتا نیام اٹ ہم گرنچی ءِ پین گچین کننگ کن بنجائی وزیر خزانہ مفتاح اسماعیل ، وزیر فوڈ سیکورٹی طارق بشیر چیمہ ، بنجائی وزیر میری ٹائم افیئرز فیصل سبزواری، وزیراعظم نا سلاہکار امور کشمیر و گلگت بلتستان قمر الزمان کائرہ و وزیر واپار سید نوید قمر ءِ ٹاسک تننگا۔