وزیراعظم شہباز شریف شنگھائی کمکار تنظیم نا کونسل آف ہیڈز آف اسٹیٹ نا سالانہ دیوان اٹی بشخ ہلنگ کن ازبکستان نا دورہ ءِ کیک

اسلام آباد۔ 13 ستمبر (اے پی پی) وزیراعظم محمد شہباز شریف شنگھائی کمکار تنظیم (ایس سی او) نا کونسل آف ہیڈز آف اسٹیٹ نا سالانہ دیوان اٹی بشخ ہلنگ کن 15 و 16 ستمبر آ سمر قند، ازبکستان نا  اِرادے ئی دورہ ءِ کیک۔ دفترخارجہ نا ترجمان نا کنڈآن سے شنبےنادے آ جاری بیان نا رداٹ وزیراعظم محمد شہباز شریف ازبکستان نا صدر شوکت مرزیوئیف نا سلہ غا دیوان اٹی بشخ ہلیک۔ دیوان اٹی شنگھائی کمکار تنظیم نا باسک ملک و مبصر ملک آتا سروک آتیان بیدس ایس سی او نا چندی تنظیم تا سروک و ایلو خصوصی مہمانک بشخ ہلیرہ۔ کونسل آف ہیڈز آف اسٹیٹ شنگھائی کمکار تنظیم نا غٹ آن بڑزکو فورم ءِ ہرا تنظیم نا حکمت عملی ، گمان و اولیت آتیا سجفنگ و وضاحت کیک۔ دیوان اٹی موسمیاتی بدلی، خور و توانائی نا رکھ و پائیدار سپلائی چین اتون اوار اوار اہم جہانی و علاقائی ویل آتیا سجفنگک وخت اس کہ داوڑنا معاہدہ و دستاویز آتا ہم منظوری  ءِ تننگک ہرا شنگھائی کمکار تنظیم نا باسک ملک آتا نیام اٹ کمکاری نا آخبت نا سمت انا تعین ءِ کیک۔ وزیراعظم محمد شہباز شریف سروک دیوان اٹی بشخ ہلنگ آن بیدس دیوان نا وخت آ شنگھائی کمکار تنظیم نا ایلو شریک راہشون تتون ہڑتوم آ کنڈآتا اوڑدہی ہم کیک۔ 2001 اٹی جوڑ مروک آ شنگھائی کمکار تنظیم سویلی و نیامی ایشیا ٹی تالان مروک اسہ بھلو علاقائی تنظیم اسے۔