واشنگٹن۔ 13 ستمبر (اے پی پی) امریکہ ٹی پاکستان نا سفیر مسعود خان زور شاغانے کہ پاکستان اٹ نوکاپی حالیت خطرناک مرسا ہِننگ ءِ ہنداخاطرآن جہانی برادری پاکستان حکومت ءِ چاگڑدی بدلی نا سوب مروک آ تباہ کن حالیت آتون مون تننگ کن قابل جوڑ کننگ کن پین کمک کے۔ ترک خبررساں ادارہ ءِ انٹرویو ٹی اوپارے کہ دا نوکاپ چاگڑدی بدلی نا براہ راست و تباہ کن نتیجہ ءِ، ننے اومیت ءِ کہ جہانی برادری خاص وڑاٹ شون ہلوک ملک و اقوام متحدہ چاگڑدی بدلی تون مون تننگ اٹ پاکستان نا کمک کن مون آ بریرہ۔ اوپارے کہ موسمیاتی بدلی تا جم نسخان بھاز زیات مریرہ۔ اوپارے کہ دا بھاز مشکل حالیت اسے انتئے کہ پاکستان اٹی داوخت آ نوکاپ کون آ بھلا بھسکاری تون ایلو مشکل آتا ہم مون تروک ءِ، ہرانا سوب آن مخلوق بے اُرا مسنے، فصل وساہدار تے بھلو کچ اسے آ نسخان رسینگانے۔ اوپارے کہ اقوام متحدہ نا سیکرٹری جنرل انتونیوگوتریس نا رداٹ پاکستان اٹی جم نسخان تا خڑچ انا کساس 30 بلین ڈالر آن زیات خلکونے۔ اوپارے کہ پاکستانیک دا آفت تون مون تننگ کن تینا دوئی وسیلہ غاتے کاریم اٹ اتنگ ءُ ولے نن دادے تنیا کننگ کپنہ ہنداخاطرآن جہانی برادری آن خواست ءِ کہ او ننا کمک ءِ کے۔ پاکستانی سفیر اقوام متحدہ نا سیکرٹری جنرل نا دورہ پاکستان و نوکاپ آن زہمی پاکستانی الس نا کمک کن ترکیہ حکومت و سوسائٹی ءِ متحرک کننگ آ ترک صدر رجب طیب اردوان نا منت واری ءِ منت واری ءِ ہرفے۔ اوپارے کہ پاکستان ءِ مہالو آن نوکاپ نا سوب آن تباہ کن حالیت مون تروک ءِ وخت اس کہ ایلو کنڈآ یوکرین نا حالیت آتا سوب آن اودے غذائی عدم رکھ انا ویل ہم مون تروک ءِ۔ اوپارے کہ نن تینا زرگزران ءِ گچین کننگ نا کوشست کرینہ و نن اوٹی سرسہب مسنہ ولے داسہ داٹی بھاز بھلو اڑاند اس ودکی مسنے۔ مسعود خان نوکاپ آن زہمی علاقہ غاتیٹی انفراسٹرکچر ءِ ملوک آ بھلا نسخان تا ذکر ءِ کرسا پارے کہ پاکستان ءِ زہمی علاقہ غاتا بحالی و پوسکن تفنگ کن بھلو زرکاری اس گرج مریک۔ اوپارے کہ آخبت اٹ داوڑنا ہر بھسکاری تون مون تننگ، آبی وسیلہ غاتا رکھ اکن اسہ گچین ءُ نظام اسے نا جوڑ کننگ تون اوار اوار تعمیراتی بشخ ءِ ریگولیٹ کننگ نا گرج ءِ۔
