حکومت تون اوار غٹ ادارہ غاک نوکاپ زدگان تا کمک اٹ لگوک ءُ، وزیر ریلوائی خواجہ سعد رفیق

لاہور۔ 12 ستمبر (اے پی پی)مسلم لیگ ن نا راہشون بنجائی وزیر ریلوائی خواجہ سعد رفیق پارینے کہ پاکستان نا کروڑ آ مخلوق نوکاپ آن زہمی مسر و داڑآن ریلوائی ٹریک ءِ ہم بھاز نسخان رسینگا، سخی تیان نوکاپ زدگان تا امداد نا خواست کیوہ، انت داوخت آ سیاسی جھگڑا زیب ایتک۔ دوشنبےنادے آ احتساب عدالت اٹی پیشی نا وخت آ میڈیا تون گپ وتران کرسا خواجہ سعد رفیق پارے کہ بنجائی حکومت تون اوار غٹ ادارہ غاک نوکاپ زدگان تا کمک اٹ لگوک ءُ، نوکاپ زدگان تا کمک ءِ کننگ کن کس اس کس اسے تورتنے۔ ہر سیاسی جماعت تینا تینا کڑد ءِ ادا کے، داوخت جنگ و جھیڑہ نا اف۔ اسہ سوج اسے نا ورندی ٹی لیگی راہشون پارے کہ آئی ایم ایف تون معاہدہ مننگ والا ءِ وخت اس کہ مسکوہی وزیرخزانہ شوکت ترین ملک ءِ ڈیفالٹ کرفنگ نا غلط ءُ حرکت اس کرے۔ اونا پاننگ ئس کہ اسہ لیڈر اس پدریسہ حکومت آ جلہو کننگ ءِ تانکہ اودے کاریم کننگ کن اِلنگپ۔