نوکاپ تون مون تننگ کن پاکستان نا دمدستی و بھلو کچ اسے ٹی مالی کمک نا گرج ءِ، سیکرٹری  جنرل اقوام متحدہ

اقوام متحدہ۔ 12 ستمبر (اے پی پی) اقوام متحدہ نا سیکرٹری جنرل انتونیوگوتریس نوکاپ تون مون تننگ اٹ قومی و علاقائی کہول آ پاکستان نا فوج و حکومت نا بھلو کچ اسے آ کروک آ کمکی کوشست آتیا خراج تحسین پیش کرسا پاکستان کن دمدستی و بھلو کچ اسے ٹی مالی کمک کننگ نازور شاغانے و پارینے کہ پاکستان اٹ نوکاپ آن زہمی علاقہ کنا ملک پرتگال نا کل رقبہ غان ہم مسہ ہنداخہ زیات ءِ۔ دورہ ءِ پاکستان نا ایسر آ کراچی ٹی صحافی تتون گپ وتران کرسا پارے کہ او دنیا ٹی چندی انسانی المیہ خنانے ولے چاگڑدی بدلی نا سوب آن داخہ در بھلو کچ اسے آ بدلی اولیکو وار خنانے و اودے بیان کننگ کن اوڑتون لوز اف۔ اوپارے کہ اودے نوکاپ زہمی تا بے پناہ مشکل و مصیبت آتیا است ہسونی ءِ داڑتون اوار اوار او کمکی کارندہ و لس بندغ نا مشکل ساہت اٹی تینا ایڑھ و ایلم تا کمک، انسانی ہمدردی نا بنداو آ بھلو کچ اسے آ امداد نا فراوانی و ہیروازم نا شاندار درور آتے ہم خنانے۔ اونوکاپ تون مون تننگ کن قومی و علاقائی کہول آ پاکستان نا فوج و حکومت نا بھلو کچ اسے آ کروک آ کمکی کوشست آتیا خراج تحسین پیش کرے۔ اوزہمی علاقہ غاتیٹی دا مشکل ساہت اٹی سول سوسائٹی، انسانی تنظیم و اقوام متحدہ نا کارندہ و ڈونر آتا کنڈآن انسانی ہمدردی نا بنداوآ پاکستان نا کمک ءِ کننگ آ اوفتا منت واری ءِ ہرفے۔ سیکرٹری جنرل پارے کہ گرج آک بھاز زیات ءُ ہندا سوب ءِ کہ پاکستان کن دمدستی و بھلو کچ اسے آ مالی کمک نا گرج ءِ و دابیرہ یکجہتی و فراخدلی نا درشانی ءِ کننگ بلکن انصاف نا ہم سوج ءِ۔ پاکستان نا وزیر خارجہ بلاول بھٹو زرداری  دورہ ءِ پاکستان آ اقوام متحدہ نا سیکرٹری جنرل نا منت واری ءِ ہرفسا پارے کہ او دا مشکل وخت اٹی پاکستان نا ودرہ ءِ کرے و کیہی تُو آن برجا بشام نا پِر تا سوب آن بھلو کچ اسے آ مروک آ بھسکاری تے ہرا۔ اوداہیت آ زور شاغا کہ دا چاگڑدی تنکی پاکستان نا ودی کروک اف ہنداخاطرآن دا تنکی تون مون تننگ کن جہانی گام گیج آتا گرج ءِ۔ یات سلے کہ اقوام متحدہ نوکاپ نا بھسکاری تتون مون تننگ اٹ پاکستان نا کمک کن مہالو آن 160 ملین ڈالرنا فلیس اپیل کرینے۔