نوکاپ نا سوب آن ہزارآ ہیکڑ رقبہ غا سلوک فصل و میوہ غاتا باغک بھس مسنو، وزارت قومی غذائی رکھ و پٹ وپول

اسلام آباد۔ 12 ستمبر (اے پی پی) وزارت قومی غذائی رکھ و پٹ وپول پارینے کہ ملک اٹی ساڑی آ بھلا بشام نا پِر و بھلو کچ اسے آنوکاپ نا سوب آن تیل انا بج، دال، سوزی تتون اوار ہزار آ ہیکڑ رقبہ غا چنکا فصل و میوہ غاتا باغک بھس مسنو۔ وزارت قومی غذائی رکھ انا رداٹ نوکاپ نا سوب آن خیبرپختونخوا ٹی تیل انا بیج آتا کم و ود 55 درسد فصل بھس مسنو  انتئے کہ ساڑی آ سیزن اٹی دا فصل 432 ایکڑ آ دسنگاسر۔ وزارت نا رداٹ ملک اٹی تیل انا بج آتا دسنگ کن کل رقبہ غان کم و ود 237 درسد باغک بھس مسنو۔ وزارت پارے کہ خیبرپختونخوا ٹی 863 ایکڑ آ دسوک آ 26 درسد دال و 91 درسد اِلار تے نسخان رسینگا انتئے کہ ساڑی آفت نا سوب آن اِلار نا پیدوار نا 2556 ایکڑ رقبہ بھس مس وخت اس کہ تمباکو نا 6 درسد فصل ءِ نسخان رسینگا۔ داکان بیدس بلوچستان اٹی ساڑی آ نوکاپ اٹی 21،960 ایکڑ رقبہ غا میوہ غاتا باغ تے نسخان رسینگا وخت اس کہ 14،882 ایکڑ آ دسوک آ چندی موسمیاتی سوزی تا فصل آک ہم بھس مسنو۔ عہدیدار پارے کہ نوکاپ آن زندھ اٹی 101،379 ڈغار آ اِلار نا درخت آتے نسخان رسینگا، 29،622 ایکڑ رقبہ غا سلوک مرچ آتا خریف نا فصل ہم بھس مس وخت اس کہ ساڑی آ نوکاپ آن پیماز نا 42،268 ایکڑ فصل ءِ نسخان رسینگا۔ اوپارے کہ سندھ آن پیماز اسہ اہم ءُ نقد آور فصل اسے و اُرائی گرج آتون مون تننگ کن اہم ءُ ذریعہ اسے۔ داکان بیدس نوکاپ و پِر تیان 12،101 ایکڑ آ ٹماٹر و 30،718 ایکڑ آ خریف نا سوز تا فصل ءِ ہم نسخان رسینگا ہرانا سوب آن اجناس نا نہاد آتیٹی ودکی مون آ بس۔