پاکستانی نژاد امریکی کاروباری برادری نوکاپ آن زہمی علاقہ غاتا بحالی ٹی تعلیم نا بشخ اٹی زرکاری آ چکار کے، مسعود خان

واشنگٹن۔ 12 ستمبر (اے پی پی) امریکہ ٹی پاکستان نا سفیر مسعود خان پاکستانی نژاد امریکی کاروباری برادری آ زور شاغانے کہ او پاکستان اٹی نوکاپ آن زہمی علاقہ غاتا بحالی ٹی تعلیم نا بشخ اٹی زرکاری آ چکار کے۔ اوکاروباری برادری ءِ چاگڑدی بدلی نا سوب آن نوکاپ نا بھسکاری تا بابت حوال اٹی پارے کہ چاگڑدی بدلی آن نئے بیرہ دنیا ءِ خطرہ مون تروک ءِ بلکن پاکستان اٹی کورونا دین آن پد تباہ کن نوکاپی حالیت آتیان  طالب علم آتے دھچکہ اس لگانے۔ پاکستانی سفیر پارے کہ پاکستان اٹی ساڑی آنوکاپ نا سوب آن بھلو کچ اسے آ مروک آ بھسکاری چاگڑدی بدلی نا سوب ءِ و چاگڑدی بدلی نا رفتار چائے پاکستان مرے یا سویلی ایشیا دنیا مرے ودسا ہِننگ ءِ۔ داوخت آ اوپاکستانی انٹرپرینیورز نا تنظیم نا صدر امبرین مرزا ءِ متحرک راہشون اس گوندسا دود انا اڈتننگ آ اونا منت واری ءِ ہرفے۔ اونوکاپ آن مروک آ بھسکاری تا سرجم آتے پارسا پارے کہ نوکاپ آن ملک انا اسہ تہائی بشخ دیر اٹی ڈبنگانے، 1400 بندغ زوال و 13 ہزار آن زیات ٹھپی مسنو۔ داوخت آ ڈویلپمنٹس ان لٹریسی (ڈی آئی ایل ) نا سی ای او فضاشاہ بشخ ہلوک آتے پاکستان اٹی تعلیم نا گچینی کن اونا تنظیم نا کنڈآن کروک آ کاریم نا بابت پارے۔ اوپارے کہ ڈویلپمنٹس ان لٹریسی (ڈی آئی ایل) پاکستان اٹی 1997 آن کاریم کننگ اٹی ءِ و داکم و ود 3 لکھ طالب علم آتا کمک ءِ کرینے و کم وود 20 ہزار استاد آتے تربیت فراوان کرینے۔ ڈی آئی ایل پاکستان اٹی نصاب آتا شونداری نا چرجوئی ٹی سرکاری و نجی بشخ اتون کاریم کننگ ءِ۔ پاکستانی سفیر مسعود خان پارے کہ فضاشاہ نا کماشی ٹی ڈی آئی ایل نا آسودہی کاریم ستاکڑزک۔ اومشکل ساہت اٹ پاکستان نا مخ تفی، یکجہتی و انسانی ہمدردی نا بنداو آ کمک ءِ کننگ آ بشخ ہلوک آتا منت واری ءِ ہرفے۔