الیکشن کمیشن عمران خان و ایلو راہشون تا برخلاف توہین عدالت نوٹس نا کانودی حیثیت آ فیصلہ ءِ ڈک کرے

اسلام آباد۔ 12 ستمبر (اے پی پی) الیکشن کمیشن عمران خان و ایلو راہشون تا برخلاف توہین عدالت نوٹس نا کانودی حیثیت آ فیصلہ ءِ ڈک کرینے وخت اس کہ تحریک انصاف نا راہشون اسد عمر و فواد چوہدری نا کنڈآن اونا وکیل توہین عدالت کیس آ نوشتہی ورندی جمع کرفے۔ الیکشن کمیشن اٹی دوشنبے نادے آ نثار درانی نا کماشی ٹی 4 باسکی بنچ سماعت کرے۔ عمران خان نا کنڈآن اونا وکیل فیصل چوہدری بینچ انا مون آ پیش مس ہرا موقف اختیار کرے کہ الیکشن ایکٹ نا سیکشن 10 انا رداٹ الیکشن کمیشن نا واکداری تے ہائی کورٹ اٹی چیلنج کننگانے انت الیکشن ایکٹ نا رداٹ الیکشن کمیشن پارے کہ الیکشن کمیشن تینا سیکرٹریٹ نا ذریعہ کاریم کیک،اسد عمر و فواد چوہدری نا کنڈآن نوشتہی ورندی جمع کرفنگا، فواد چوہدری تینا ورندی ٹی پارے کہ الیکشن کمیشن تون توہین آ سزا تننگ نا اختیار اف دا کاریم عدلیہ نا ءِ، اوفتا خلوک آ دوبہ غاک راست افس، مثبت تنقید توہین اف، دانوٹس ءِ پدی ہلنگے۔ کمیشن توہین عدالت نوٹس نا کانودی حیثیت آ فیصلہ ءِ ڈک کرے۔