حلقہ این اے 157 ملتان، پی پی 139 شیخوپورہ، پی پی 241 بہاولنگر و پی پی 209 خانیوال اٹی ضمنی گچین کاری کن پولنگ 9 اکتوبر آ مریک

اسلام آباد۔ 12 ستمبر (اے پی پی) قومی اسمبلی نا حلقہ این اے 157 ملتان، پی پی139 شیخوپورہ، پی پی 241 بہاولنگر و پی پی 209 خانیوال اٹی ضمنی گچین کاری کن پولنگ 9 اکتوبر آ مریک وخت اس کہ ایلو 9 حلقہ غاتیٹی ضمنی گچین کاری کن دیوان 14 ستمبر آ بٹنگا۔ الیکشن کمیشن نا اہم دیوان دوشنبے نادے آ سکندر سلطان راجہ چیف الیکشن کمشنر نا کماشی ٹی اڈہلک۔ دیوان اٹی الیکشن کمیشن نا باسک آتیان بیدس سیکرٹری الیکشن کمیشن و ایلو سینئر آفیسر آک بشخ ہلکر۔ سیکرٹری الیکشن کمیشن الیکشن کمیشن ءِ پارے کہ 8 ستمبر 2022 آ الیکشن کمیشن 13 قومی و صوبائی اسمبلی نا حلقہ غاتا ضمنی گچین کاری نوکاپ نا بھسکاری، ہن و بر نا مخدوش حالیت، قومی ایمرجنسی و قومی ادارہ ہرافتے ٹی پولیس، پاک فوج، رینجر و ایف سی، انتظامی و ایلو آفیسر آتا نوکاپ زہمی تا کمک، آبادکاری و امن وایمنی ءِ پک کننگ کن ڈیوٹی و ضمنی گچین کاری تیٹی اوفتا خذمت آتا عدم دستیابی نا سوب آن پولنگ نا تاریخ ءِ ملتوی کننگاسس۔ دا التواء و گچین کاری تا دُوارہ تاریخ نا بابت دیوان اس بٹنگ انگانے۔ این اے 157 ملتان، پی پی 139 شیخوپورہ، پی پی 241 بہاولنگر و پی پی 209 خانیوال اٹی پولنگ 9 اکتوبر آ مریک۔ اومیت ءِ کہ داوخت اسکان غٹ قومی ادارہ بشمول پولیس، پاک آرمی، رینجر و ایف سی الیکشن کمیشن نا کمک کن ساڑی مریرہ۔ داکان بیدس قومی اسمبلی نا 9 حلقہ جاٹ ہرافتے ٹی پولنگ ءِ ملتوی کننگاسس۔ اسلام آباد ہائی کورٹ الیکشن کمیشن نا 29 جولائی 2022 نا نوٹیفکیشن ہراٹی قومی اسمبلی نا باسک آتے ڈی نوٹیفائی کننگاسس معطل کرینے ولے الیکٹرانک میڈیا ٹی بروک آ خبرآتا رداٹ شرفمند آ عدالت وضاحت کرینے کہ دا فیصلہ نا اطلاق بیرہ پٹیشن آتا حد اسکان مریک۔ الیکشن کمیشن سیکرٹری الیکشن کمیشن ءِ پارت کرے کہ اسلام آباد ہائی کورٹ آن المی وضاحت ہلے تانکہ دا 9 حلقہ غاتا گچین کاری تا تاریخ آتا بابت الیکشن کمیشن سجفنگ کے۔ داچرجوئی ٹی الیکشن کمیشن نا دُوارہ دیوان 14 ستمبر 2022 آ مریک۔ سندھ بلدیاتی گچین کاری تا ارٹ میکو ریسہ و بلوچستان نا ضلع دُکی، لورالائی، موسیٰ خیل و مستونگ نا گڑاس پولنگ اسٹیشن تا گچین کاری تا اڈتننگ ہرا ہندا بڑزکو سوب آتا بناآ ملتوی کننگاسر دا چرجوئی ٹی صوبائی حکومت سندھ و بلوچستان آن اسہ ہفتہ نا تہہ ٹی رپورٹ بٹنگانے تانکہ دا گچین کاری تا اڈتننگ ہم اخس زوت مرے ممکن کننگ مرے۔ دا چرجوئی ٹی صوبائی الیکشن کمشنرآتیان ہم رپورٹ بٹنگ انگ ءِ۔