ڈیرہ اللہ یار ۔10ستمبر (اے پی پی): مزن وزیر محمد شہباز شریف ءُ یونائیٹڈ نیشن ءِ سیکرٹری جنرل انٹو نیو گوتریس ءَ شمبے ءِ روچ ءَ سیلاپ ءَ چہ آماچیں اوستہ محمد، ضلع جعفر آباد ءَ ریلیف کیمپ ءُ کیمپ ءَ جوڑیں اسکول ءِ تر ءُ تاب کت ءُ سیلاپ ءَ آماچیں مردم آں گوں ھیال ریچی کت۔ مزن وزیر ءُ سیکرٹری جنرل ءِ کیمپ ءَ جوڑیں سکول ءِ تر ءُ تاب ءِ موہ ءَ زھگ آں وش اتک کت۔ سیکرٹری جنرل ءَ اے موہ ء، سر ءَ زھگ آں تران کنان ءَ گوشت کہ یونائیٹڈ نیشن زھگ آنی وانگ ءُ زانگ ءِ واستہ وتی جوانیں کرد ءَ پیلو کن اَنت۔ اے موہ ء، سر ءَ سر وزیر بلوچستان عبدالقدس بزنجو ءَ یونائیٹڈ نیشن ءِ سیکرٹری جنرل ءُ مزن وزیر ءَ بلوچستان ءَ سیلاپ ءَ چہ تباہی آنی بابت بریفنگ دات۔ آئی ءَ گوشت کہ موسمی مٹ ءُ بدلی آنی سبب ءَ بلوچستان ءَ گوستگیں سال آنی مقابلہ ءَ گیش ھور بوتگ ۔ سیلاپ ءَ چہ بلوچستان ءِ پراھ ءُ شاھیگانیں ڈگار آماچ بوتگ۔ لائیوسٹاک کشت ءُ کشار، ریلوے ءُ سڑک آناں باز تاوان رستگ۔ سیلاپ ءَ چہ آماچیں مردم آنی آسودگی ءِ واستہ صوبائی حکومت ءِ واستہ یک ٹوھیں جیڈھ ات۔ سیلاپ ءَ چہ آماچیں دمگ آنی تہ ءَ میڈیکل کیمپ جنگ بوتگ۔ بلوچستان ءِ 5 ضلع آنی تہ ءَ اے وھد ءَ سیلاپی آپ است انت، بلوچستان حکومت ءَ آماچیں مردم آنی ریسکیو کتگ۔ آماچیں مردم آنی برجائی ءِ واستہ مالی کمک ءِ ضلورت انت۔ اے موہ ءِ سر ءَ مزن وزیر ءَ گوشت کہ سیلاپ ءَ چہ آماچیں مردم آنی برجائی ءِ واستہ اے وھد ءَ درستاں چہ مستریں جیڈھ ات، میاں اوستمانی برات اے جاور ھال آں چہ در کپگ ءِ واستہ پاکستان ءِ کمک ءَ بکن اَنت۔ بنجاھ صوبائی حکومت آنی گوما یکجائی ءَ آماچیں مردم آنی برجائی ءِ واستہ گامگیج کنگ ءَ انت۔ وزیر ءِ اھوالکاری مریم اورنگزی ، وزیر ءِ درئی کار بلاول بھٹو زرداری ، وزیر منصوبگ بندی احسن اقبال ھم مزن وزیر ءِ ھمبراھ ات۔
