اوستہ محمد۔10ستمبر (اے پی پی): مزن وزیر شہباز شریف ءُ یونائیٹڈ نیشن ءِ سیکرٹری جنرل انتو نیو گوتریس ءَ شمبے ءِ روچ ءَ ضلع جعفر آباد ءِ سیلا پ ءَ چہ آماچی دمگ اوستہ محمد ءِ تر ءُ تاب کت۔ بلوچستان ءِ چیف سیکرٹری ءَ مزن وزیر شہباز شریف ءُ یونائیٹڈ نیشن ءِ سیکرٹری جنرل ءَ را مون سون ءِ استیں ھور ءُ ھار ءُ سیلاپ ءَ چہ سرجمیں صوبگ ءَ کمکی سامان ءُ برجائی ءِ کوشست آنی بابت ءَ سرجمیں بریفن دات۔ مزن وزیر شہباز شریف ءَ اے موہ ءِ سر ءَ یونائیٹڈنیشن ءِ سیکرٹری جنرل ءَ را گوشت کہ بلوچستان ءِ سرڈگار پراھ ءُ شاھیگانی ءَ درستاں چہ مستریں آصوبگ انت ءُ سیادی داروکیں کارندہ آناں استیں دمگ آنی تہ ءَ پجگ ءَ سکی ءُ مشکل آنی گوما دیم پہ دیمی انت، آئی ءَ گوشت کہ سیلاپ ءَ چہ بنیاتی کوکا، دگ ءُ رابطہ پل آناں سک باز تاوان رستگ۔ مزن وزیر ءَ گوشت کہ سیلاپ ءَ چہ آماچیں دمگ آنی برجائی ٹوھیں جیڈھ ات، بنجاھی حکومت ریلیف ءِ چست ءُ ایر آنی تہ ءَ صوبائی حکومت ءِ گوما کمک کنگ ءَ انت پدا ھم انچوکیں جیڈھ آنی مقابلہ کنگ ءِ واستہ میاں اوستمانی برات آناں پاکستان ءِ کمک ءِ واستہ دیم ءَ آیگ لوٹ ائیت۔ مزن وزیر ءَ گوشت کہ بلوچستان کدرتی آسراتی ءَ چہ مالا مال انت ءُ آئی ءِ حکومت بلوچستان ءِ دیمروئی ءَ دلگوشی دیگ ءَ انت۔ سر وزیر بلوچستان عبدالقدوس بزنجو ءَ اے موہ ءِ سر ءَ یونائیٹڈ نیشن ءِ سیکرٹری جنرل ءَ را گوشت کہ ریسکیو ، ریلیف ءُ برجائی ءِ کوشست آنی واستہ صوبائی حکوتم وتی توامیں آسراتی آناں کارمرز کنگ ءَ انت۔ آئی ءَ سیلاپ ءَ چہ آماچیں مردم آنی کمک ءِ واستہ میاں اوستمانی برات آں چہ کمک ءِ اپیل کت۔ ایشی ءَ چہ پیسر اوستہ محمد ءَ پجگ ءِ پد ءَ جوڑیں گورنر بلوچستان ءُ سر وزیر عبدالقدوس بزنجو ءَ مزن وزیر ءُ یونائیٹڈ نیشن ءِ سیکرٹری جنرل ءَ را وش اتک کت۔
