اسلام آباد۔ 09 ستمبر (اے پی پی) وزیراعظم محمد شہباز شریف ملکہ برطانیہ الزبتھ دوئم نا کزیت برطانوی وزیراعظم الزبتھ ٹرس ءِ ہڑزخواہی چٹھی اس نوشتہ کرینے ہراٹی ملکہ الزبتھ دوئم نا کزیت آ برطانوی ہم منصب و اونا توسط اٹ شاہی خاہوت تون است ہسونی نا درشانی ءِ کرینے۔ جمعہ نادے آ وزیراعظم آفس نا میڈیا ونگ آن جاری بیان نا رداٹ وزیراعظم چٹھی ٹی پارے کہ بحیثیت ملکہ، برطانیہ آ بھلو وخت اسسکان حکمرانی کننگ تون اوار اوار ملکہ الزبتھ دوئم دا غٹ وخت اٹی برطانیہ و مچ آ دنیا ٹی مثبت بدلی تیٹی اہم کڑد ادا کرے، ملکہ الزبتھ دوئم نا دولت مشترکہ کن خلوص و اونا چاروکی ٹی دا تنظیم دنیا نا غٹ آن بھلا آجو ملک آتا تنظیم جوڑ مس۔ وزیراعظم پارے کہ بھلو وخت اسسکان السی فائدہ غاتا رکھ اکن خذمت آتیان پد ہم ملکہ الزبتھ نا شخصیت و اونا ساڑی گری یونائیٹڈ کنگڈم و مچ آ دنیا نا مخلوق کن سیوت و اخوت نا طاقت نا نشان جوڑ مس، برطانیہ و دولت مشترکہ نا سروک نا وڑاٹ پاکستانی الس نا ملکہ الزبتھ کن مدام شرف و عزت نا جوزہ غاک ئسر۔ وزیر اعظم پارے کہ دہائی تیا تالان اونا حکومت اٹی پاکستانی الس و ملکہ الزبتھ نا نیام اٹ دا عزت و شرف نا رشتہ ٹی سوگوی ٹی ودکی مس۔ وزیراعظم پارے کہ مشکل نا داساہت اٹی کنتون اوار مچ آ پاکستانی قوم انا غٹ تر ہمدردی برطانوی شاہی خاہوت، برطانوی حکومت و الس تون ءِ۔
