اسلام آباد۔9ستمبر (اے پی پی): حال و اھیوال کاری ء ُ شنگکاری ءِ بنجاہی وزیر مریم اورنگزیب ءَ اقوام متحدہ ءِ سیکریٹری جنرل انتونیوگوتیرس ءَ را پاکستا ن آیگ ءَ وش اَتک کتگء ُ گشتگ کہ سیکریٹری جنرل اے موہ ءَ ترءُتاب کنگ ءَ اِنت وہدے کہ پاکستان ءِ نیم بہر ہار ءَ چہ آپ ءِ توکا اِنت، آئی ءِ ترء ُتاب ءَ چہ دنیا پاکستان ءَ ہار ءَ چہ بوتگیں تباہی ءَ چہ گیش سرپد بیت۔ جمعہ ءِ روچءِ وتی بیان ءِ تہا بنجاہی وزیر ءَ گشتگ کہ گرانیں ساہت ءَ یکوئی ءِ درشانی کنگ ءِ ھاترءَ پاکستان ءَ آیگ ءَ اقوام متحدہ ءِ سیکریٹری جنرل ءِ شکرء ُ منت ءَ گراں۔ آئیءِ ترء ُتاب ءَ چہ پاکستان ءِ ہار ءِ آماچیں مردمانی جیڑہء ُجنجالاں میاں اوستمانی تک ءَ پدر کنگ ءَ کمک رسیت۔ آئی ءَ گشتگ کہ سیکریٹری جنرل اقوام متحدہ ءَ پاکستان ءِ ہارءِ آماچیں مردمانی کمک ءِ ھاترءَ 160 ملین ڈالر ءِ فلیش فلڈ دزبندی جاری کتگ کہ لکھ ستاہ کرز ایت۔ مریم اورنگزیب ءَ گشتگ کہ اے ترء ُ تاب موسمیاتی مٹء ُ بدلی ءِ ناوشیں اثرآنی نتیجگانی سرپدی دیئگ ءَ باز کمک کار بیت۔ آئی ءَ گشتگ کہ میاں اوستمانی براتی ءَ را ہار ء ُ قدرتی آپت ءَ چہ آماچ بوتگیں ملک آنی کمک کنگ ءِ ھاترءَ دیما آیگ لوٹ ایت۔ بنجاہی وزیر ءَ گشتگ کہ موسمیاتی مٹء ُبدلی ءِ نتیجگ ءِ گیش بوتگیں ناگیگیں جاورآناں گرء ُدار کنگءِ ھاترءَ دیما آیگ لوٹ ایت۔
