اسلام آباد۔ 09 ستمبر (اے پی پی) اقوام متحدہ نا سیکرٹری جنرل انتونیوگوتریس پارینے کہ او تباہ کن نوکاپ آن پد پاکستانی الس تون ہمدردی نا درشانی ءِ کننگ کن پاکستان آ سرمسنے۔ جمعہ نادے آاسلام آباد آ بننگ آ تینا ٹویٹ اٹی اقوام متحدہ نا سیکرٹری جنرل پارے کہ او نوکاپ زہمی تتون یکجہتی نا درشانی ءِ کننگ کن اِرادے ئی دورہ غا پاکستان آ سرمسنے ، او تینا دورہ ٹی نوکاپ آن زہمی علاقہ غاتا دورہ و زہمی تتون اوڑدہی کیک۔ اقوام متحدہ نا سیکرٹری جنرل انتونیوگوتریس دورہ ٹی وزیراعظم محمد شہباز شریف و وزیر خارجہ بلاول بھٹو زرداری تون ہم اوڑدہی کیک۔ داکان مست اقوام متحدہ نا سیکرٹری جنرل نا نوکاپ زہمی تتون یکجہتی نا درشانی ءِ کننگ کن پاکستان آ سرمننگ آ اسلام آباد بالی پٹ آ وزیرمملکت خارجہ امور حنا ربانی کھر و وزارت خارجہ نا کمامدار آک اودے بخیر کریر۔ داکان مست اقوام متحدہ نا سیکرٹری جنرل پاکستان آ بننگ نا وخت آ تینا ٹویٹ اٹی موسمیاتی بدلی نا سوب آن پاکستان اٹی پِر و ہولناک نوکاپ آن مروک آ بھسکاری آن زہمی بندغ آتا بحالی کن جہانی برادری آن است انا حب اٹ کمک کننگ نا خواست کرینے۔
