اسلام آباد۔ 09 ستمبر (اے پی پی) بنجائی وزیر حوالکاری و شینکاری مریم اورنگزیب اقوام متحدہ نا سیکرٹری جنرل انتونیوگوتریش ءِ پاکستان آ بننگ آ بخیر کرسا پارینے کہ سیکرٹری جنرل ہندن ءُ موقع سے آ دورہ کننگ ءِ ہراتم اسہ تہائی پاکستان نوکاپ اٹی ڈبینگوک ءِ، اونا دورہ غان دنیا پاکستان اٹی نوکاپ اٹی مروک آ بھسکاری تیان جوان وڑاٹ معلومدار مننگ کیک۔ جمعہ نادے آ تینا بیان اٹی بنجائی وزیر حوالکاری پارے کہ مشکل ساہت اٹی یکجہتی نا درشانی کن پاکستان آ بننگ آ اقوام متحدہ نا سیکرٹری جنرل نا منت واری ءِ ہرفنہ۔ اونا دورہ ءِ پاکستان آن نوکاپ زہمی تا ویل و مشکل آتے جہانی کہول آ تالان کننگ اٹ کمک رسینگک۔ اوپارے کہ سیکرٹری جنرل اقوام متحدہ پاکستان نا نوکاپ زہمی تا کمک کن 160 ملین ڈالر نا فلیش فلڈ اپیل جاری کرے ہرا ستاکڑزک۔ مریم اورنگزیب پارے کہ دا دورہ موسمیاتی بدلی تا مہلک اثرآتا احساس ترفنگ اٹی ہم کمکار جوڑ مریک۔ اوپارے کہ جہانی برادری ءِ نوکاپ و قدرتی آفت آتیان دوچار نیزگار ملک آتا کمک کن مون آ بروئی مریک۔ بنجائی وزیر حوالکاری پارے کہ موسمیاتی بدلی تیٹی ودوک آ خطرہ غاتون مون تننگ کن اواری اٹ مون آ ہنوئی مریک۔
