اسلام آباد۔ 08 ستمبر (اے پی پی) وزیراعظم محمد شہباز شریف پارینے کہ امریکہ نا کنڈآن پدریسہ کمکاری، یکجہتی و نوکاپ زدگان تیکن امداد بھاز اہمیت تخک، پاکستان تین پہ تینی سیکورٹی، جان جوڑی، موسمیاتی بدلی، واپار و زرکاری نا بشخ آتیٹی پاک امریکہ تعلقداری تے پین سوگو کننگ کن سنبرینگوک ءِ۔ داخیال آتا درشانی ءِ او امریکی وزیر خارجہ نا سینئر پالیسی سلاہکار ڈیرک چولیٹ تون گپ وتران کرسا کرے ہرا پنچ شنبے نادے آ داڑے اوڑتون اوڑدہی کرے۔ اوڑدہی ٹی ڈیرک چولیٹ پاکستان اٹی ساڑی آ پِر و نوکاپ اٹی مروک آ نہادی جان تا زیان آ پاکستانی حکومت و الس تون ہڑزخواہی و ہمدردی نا درشانی ءِ کرے۔ وزیراعظم ڈیرک چولیٹ نا دا مشکل وخت اٹی وخت اس کہ پاکستان تاریخ نا غٹ آن تباہ کن نوکاپ آن بھاز بے وڑ گواچی ءِ، دورہ ءِ کننگ آ منت واری ءِ ہرفے۔ وزیراعظم داوخت آ معلومدار کرے کہ 3 کروڑ 30 لکھ آن زیات پاکستانی داآفت آن داتم اسکان زہمی مسنو وخت اس کہ 1،300 آن زیات زوال کرینو۔ داڑتون اوار اوار کشت وکشار، ساہدار، ملکیت و اہم انفراسٹرکچر ءِ بھاز نسخان رسینگانے۔ وزیراعظم پارے کہ کچٹ انگا دیر انا کاریم اٹ اتنگ آن ودی مروک آ ناجوڑی تا ممکنہ تالانی ہم گڑتی نا حالیت اختیار کننگ کیک۔ حکومت دا تباہ کن حالیت آتیٹی اولیتی بنداو تیا ریسکیو و ریلیف آپریشن اٹی پورو وڑاٹ لگوک ءِ۔ وزیراعظم ریسکیو و ریلیف آن پد نوکاپ زدگان تا بحالی و انفراسٹرکچر و نجی ملکیت آتا پوسکن تفنگ نا بھلا چیلنج ءِ ہم مون آ تخا۔ اوپارے کہ امریکہ نا کنڈآن پدریسہ کمکاری، یکجہتی و نوکاپ زدگان تیکن امداد بھاز اہمیت تخک، انتئے کہ اپکستان و امریکہ نا تین پہ تینی کمکاری آ مبنی دیرینہ تعلقداری دہائی تیا تالان ءِ۔ وزیراعظم پاک امریکہ تعلقداری نا اہمیت ءِ مون آ تخسا پارے کہ پاکستان سیکورٹی، جان جوڑی، موسمیاتی بدلی، واپار و زرکاری نا بشخ آتیٹی د تعلقداری تے گہر ا و گیشتر کننگ کن سنبرینگوک ءِ ، اوتین پہ تینی پت ، شرف و افہام و تفہیم نا اصول آتیا مبنی ہڑتوم آ ملک آتا نیام اٹ تعمیری و پائیدار رابطہ غاتا اہمیت آ زور شاغا۔ کرہ ارض آ موسمیاتی بدلی نا تباہ کن اثر آتے تالان کرسا وزیراعظم چاگڑدی ہدف آتے پورو کننگ کن جہانی کوشست آتے ترند کننگ نا گرج آ زورشاغا ہراٹی دا چیلنج تون گچین وڑاٹ مون تننگ کن موسمیاتی بنداو آ فنڈنگ ءِ متحرک کننگ ہم اوار ءِ۔ علاقائی رداٹ وزیراعظم پرامن و سوگو اوغانستان کن اوغان میرات آتے واگزار کننگ نا اہمیت ءِ تالان کرے۔ اوپارے کہ جہانی برادری ءِ اوغانستان تون رابطہ غاتے ودفنگ نا گرج ءِ۔ بھارت تون اوار ڈیہہ ٹی امن نا مون آ دننگ کن پاکستان نا عزم ءِ تالان کرسا وزیراعظم پارے کہ اقوام متحدہ نا سلامتی کونسل نا قرارداد و کشمیری الس نا است خواہی تا رداٹ دیرینہ جموں وکشمیر جھیڑہ نا ایسری بھاز المی ءِ۔ بائیڈن انتظامیہ نا کنڈآن ڈیرک چولیٹ کلہو ترسا پارے کہ امریکہ دا ساڑی نوکاپ آن ودی مروک آ چیلنج نا رداٹ پاکستان تون سلک، اہم کمک فراوان کیک، و زہمی مخلوق نا زند انا بحالی و زہمی کمیونٹی تا پوسکن تفنگ اٹ کمک کیک۔
