اسلام آباد۔8ستمبر (اے پی پی): توانائی ءِ بنجاہی وزیر خرم دستگیر خان ءَ گشتگ کہ حکومت ءَ محکمیں ء ُ ساپیں توانائی ءِ ھاسل کنگءِ جزم کتگ، درآمدی ایندھن ءِ بدل ءَ ہائیڈل،سولر،ونڈ،تھر کول ءُ نیو کلیئر وڑیں ہندی آسراتی ءَ چہ بجلی ءِ پیداوار ءَ را دلگوشی دیئگ بیت۔ اےھیالانی درشانی آئی ءَ پنچ شمبے ءِ روچءَ سی پیک ءِ ردءَ توانائی ءِ منصوبہ آنی ہوالگءَ رپورٹءِ بندات کنگءِ موہ ءَ کتگ۔ آئی ءَ گشتگ کہ توانائی پاکستان ءِ ھاترء باز حاسیں پِڑ اِت ءُ ایشی ءِ معاشی دیمروئی ءِ تہا بازیں حاسیں کرد اِت۔ آئی ءَ گشتگ کہ محکمیں دیمروئی ءِ ہپتمی ہدف کلین ء ُ دست کپوکیں انرجی اِنت کہ ایشی ءِ ھاترءَ ما کوشست کنگ ءَ اَنت ۔ آئی ءَ گشتگ کہ توانائی ءِ وزارت ، پی پی آئی پی، توانائی بورڈ ء ُ دومی ادارگاں نوکی آرگ بوہگءَ اِنت، گورننس ءَ گہتر کنگءَ اَنت، 3 کروڑ 30 لکھ مردم ہارءَ چہ آماچ بوتگ اَنت، مزنیں تباہی بوتگ، گوستءِ حکومتءَ گرمی آں بجلی ءِہوالگءَ ایچ وڑیں منصوبہ بندی ناکتگ۔ آئی ءَ گشتگ کہ 2013 ءَ پاکستان ءَ را بجلی ء ُ گیس ءِ باز کمی ءِ دیمپانی بوتگ ء ُ 18 کلاک لوڈشیڈنگ بوتگ، آ وہدءَ ناشرکاری ءِ ہم دیمپانی بوتگ ء ُ پاکستان ءَ ایچ زرکار آیگ ءَ ساڑی نابوتگ، آ وہدءَ چین ءَ آتکگ ء ُ مئے کمک کتگ۔ توانائیءِ وزیر ءَ گشتگ کہ سی پیک ءِ ردءَ بازیں کمپنی پاکستان ءَ اَتکگ اَنت، چین ءَ ثابت کتگ کہ آ پاکستان ءِ راستیں شریدار اِنت، دنیاءَ جیوپولیٹیکل مٹ ء ُبدلی بوہگءَ اِنت ء ُ انرجی میپ ہم مٹء ُ بدل ہوہگءَ اَنت، دنیاءَ را ٹیکنالوجی، صنعتی دیمروئی ء ُ دومی پڑآں چین ءَ چہ سرپدی زورگ لوٹ ایت۔ بنجاہی وزیر ءَ گشتگ کہ مئے پالیسی اِنت کہ پاکستان ءَ بجلی ودی کنگءِ ہمک نوکیں منصوبہ ملکی آسراتی ءَ را کارمرز کتگء ُ جنگ بوتگ کہ آئی ءِ تہا ہائیڈل ، سولر، ونڈ، تھرکولء ُنیوکلیئر ہوار اَنت۔
