اسلام آباد۔8ستمبر (اے پی پی):اقوام متحدہ ءِ سیکرٹری جنرل انتونیو گوتریش ہار ء ِ آماچ بوتگیں پاکستان ءِ گوما یکوئی ءِ درشانی کنگ ءِ ھاترءَ (باندا) جمعہ ءِ روچءَ پاکستان ءِ دوروچی ترءُتاب ءَ کنت۔ دری کارانی کارگس ءِ جارچین ءِ نیمگءَ چہ پنچ شمبے ءِ روچءَ جاری بیان ءِ ردءَ اقوام متحدہ ءِ سیکرٹری جنرل 9 تاں 10 ستمبر ءَ پاکستان ءِ ترءُتاب ءَ کنت کہ آئی ءِ مول ء ُ مراد ملک ءَ ترندیں ہورء ُ ہار ءِ آماچ بوہگ ءَ پاکستان ء ُ گوں آئیءِ اُلسءَ یکوئی ءِ درشانی کنگ اِنت۔ اقوام متحدہ ءِ سیکرٹری جنرل انتونیو گوتریس ترءُ تاب ءِ وہدءَ پاکستانی قیادت ء ُ مز ن تک ءِ حکام ءَ گوں گندءُنندکنت کہ آئی ءِ تہا آ موسمیاتی مٹء ُ بدلی ءَ چہ بوتگیں راجی ءُ میاں ء ُ اوستمانی ردعمل ءِ سرءَ ھیال ءُ لیکہ ءِ درشانی ء َ کنت۔ سیکرٹری جنرل موسمیاتی تباہی ءِ آماچ بوتگیں دمگانی ہم ترءُتاب ءَ کنت ء ُ بے لوگ بوتگیں ھاندان ءُ آماچیں دمگاں بنداتی رکینگ ء ُ کمکی کاروائی کنوکانی گوما گپ ءُ تران کنت۔ جارچین ءِ ردءَ اقوام متحدہ ءِ سیکرٹری جنرل لکھاں آماچیں مردمانی ھاترءَ حکومت ءِ رکینگی ء ُ کمکی کو شستانی ہمراہ داری کنگءَ اقوام متحدہ ءِ انسانی کمک ءِ کارانی وت سرپانکی ءَ کنت۔
