اسلام آباد۔8ستمبر (اے پی پی): سرجمیں ملک ءَ بحریہ ءِ روچ گوں جوشء ُ جزبگ ءَ گوازینگ بوتگ، 8 ستمبر 1965 ءَ پاک بحریہ ءِ نامیرانیں قربانیانی یاد ءَ گوازینگ بیت۔ پاک بحریہ ءِ جارچین ءِ رد ءَ 8 ستمبر بحریہ ءِ روچ ملکی راج دپتر ءِ یک مزنیں ء ُ یات گاریں روچ اِت، وہدے کہ 1965 ءِ جنگءِ وہد ءَ پاک بحریہ ءِ بامرداں وتی قربانی ، نامیرانیں جزبگ ء ُ مزنیں کاروائی آں چہ دژمن ءِ ناپاک مول ء ُ مراد پروش داتگ اَنت۔ 7 ء ُ 8 ستمبر 1965 ءِ شپ پاک بحریہ ءِ ہپت جنگی آپی گراباں ” آپریشن سومنات‘‘ ءِ وہدءَ بھارتءِ دیکا دوار ءِ سرءَ بمب گواری کتگ۔ اے آپریشن ءَ بھارتی ریڈار اسٹیشن ء ُ ریڈیو بیکن ءَ را تباہ کتگ کہ کراچی ءِ سرءَ اُرش کنگء ِ ھاترءَ بھارتی فضائیہ ءِ گرابانی رہشونی ءَ کنگ بوتگ۔ بحریہ ءِ روچ ءَ پاکستان نیوی ءِ یکیں آبدوز غازی ءِ راج دپتری کارنامگانی یات ءَ ہم گوازینگ بیت۔ 8 ستمبر ءِ روچ پاکستان ءِ بحری راج دپتر ءِ تہا باز ارزشت داریت کہ آیوکیں نسل ءِھاترءَ پھر ءِ گپ اِنت۔
