اسلام آباد۔7ستمبر (اے پی پی):پاکستان ءَ ایتھوپیا ءِ سفیر جمال بیکر عبداللہ ءَ گوشتگ کہ ایتھوپیا ءِ اسلام آباد ءَ وتی سفارتی مشن ءِ یک شل ءَ بنگیج کنگ ءِ پیسلہ دوئیں ملک آنی نیام ءَ دو نیمگی تجارتی ءُ اقتصادی یکوئی آناں گیش مھکم کنگ ءَ کمکار سہرا بیت۔ چار شمبے ءِ روچ ءَ “اے پی پی” ءِ گوما ھاسیں گلگدار ءَ آئی ءَ گوشت کہ ایتھوپیا ءُ پاکستان یک کانودی تجارتی فریم ورک تیار کنگ انت ایش دوئیں ملک آنی سرمایہ کار آناں گیش مھکم کنگ ءِ ھیل کاری دنت ایشی ءِ نتیگج ءَ دوئیں ملک آنی تجارتی کساس ءِ تہ َ گیشی بیت۔ آئی ءَ گوشت کہ ایتھوپیا ءُ پاکستان ءِ نیام ءَ سفارتی یکوئی 1958 ءَ جوڑ بوتگ انت ایشی ءَ چہ پد دوئیں ملک آنی نیام ءَ جوانیں یکوئی ءُ میاں اوستمانی ایمنی ءُ سلامتی ءَ مھکمیں کمک برجا بوتگ۔ ایتھوپیا ءِ سفیر ءَ گوشت کہ پاکستان ءَ یونائیٹڈ نیشن ءِ سلامتی کونسل ءَ ھم ایتھوپیا ءِ کمک کتگ ایشی ءِ واستہ ما پاکستنا ءِ بے کساس شگر ءُ منت وار آں۔ سی پیک ءَ ایتھوپیا ءِ ھواھگ آںی بابت ءَ آئی ءَ گوشت کہ سی پیک پاکستان ءُ چین ءِ نیام ءَ بنیاتی کوکا ءِ ٹوھیں منصوبگ آں چہ یک ات، ایش پاکستان ءَ را ایندگر دگنیا ءَ گوں بندوک کنت۔ آئی ءَ گوشت کہ گوادر ءُ جبوتی لُکوکیں کشک انت ءُ ایشرا پاکستان ءَ ایندگر افریقی ملک آں گوں نزیک کنت۔ جمال بیکر عبداللہ ءَ گوشت کہ بیلٹ اینڈ روڈ انیشیٹو ءِ چیر دستی ءَ جبوتی ءَ چہ ادیس اباابا ءَ تاں ریلوے ءِ منصوبگ پیسر ءَ چہ سرجم بوتگ، ایتھوپیا ایشی ءِ چار ءُ تپاسی ءَ کنگ ءَ انت ءُ سی پیک منصوبگ ءَ ھاسیں واھگ دارگ ءَ انت۔ ایتھوپیا ءِ سفیر ءَ پاکستانی آنی واستہ آن ارائیول ویزا پالیشی ءِ ھوالگ ءَ یک جستے ءِ پسو ءَ دیان ءَ گوشت کہ مردم آناں یک جاھے تاں دومی جاھ ءَ روگ ءَ آسانی پیداک کنگ ءِ یک کار رپک ات ءُ آ ایتھوپیا ءَ بیا انت ءُ سرمایہ کاری بکن انت، اے گپ ءِ دل یکیمی جوڑ کنگی انت کہ آوانی ویزا ءِ کار ءَ را اپ ڈیٹ کنگ بہ بیت ، ایش زوت ءُ گشاد ءُ دل یکیمی بہ بیت۔
ایشی ءَ چہ پیسر ایتھوپیا ءِ وزیر ءِ مملکت برائے درئی کار رضوان حسین رامیٹو ءَ ھم گوشتگ کہ ایتھوپیا پاکستان ءِ تاجر آنی واستہ ویزہ آن ارائیول ءِ آسراتی ءَ چہ افریقی ملک آنی تر ءُ تاب ءَ کت بکن آں۔ اے گپ لائک ءِ ستا انت کہ پاکستان ءُ ایتھوپیا ءِ نیام ءَ تجارتی کساس 63 ملین ڈالر انت، ایتھوپیا ءِ پاکستان ءَ را درآمدات کساس 24.6 ملین ڈالر انت وھدیکہ ایتھوپیا ءَ را پاکستان ءِ برآمدات 38.6 ملین ڈالر انت۔ افریقہ 1.2 ارب آباتی ءِ مارکیٹ انت ءُ تجارت ءِ آیوکیں باندات نوں افریقہ ءُ ایشیا ءَ انت۔ ایتھوپیا ءُ پاکستان ءَ را سائنس ءُ ٹیکنالوجی، وانگ ءُ زانگی ، جوڑیشتی صنعت، فارماسیوٹیکل ءُ گارمنٹس ءَ ھوار توامیں شوبگ آنی تہ ءَ یکوئی آناں ودینگ ءِ واستہ گیشاں چہ گیش محنت کنگ لوٹ ائیت۔ ایتھوپیا ءِ کافی ءُ چائی تاک مزیدار ءُ سستا انت ، ایش پاکستان ءَ برآمد کنگ بنت۔ ھمے رنگ ءَ پاکستان ءِ ٹیکسٹائل ءُ داوائی جوڑ کنوکیں تجارتی کساس ءَ کمکار سہرا بنت، ایتھوپیا پاکستان ءَ چہ دوائی جوڑ کنوکیں درستاں گیشتری چیز درآمد کنگ ءَ انت۔ ایتھوپیا ءَ فیکٹری جنگ ءَ چہ پد برآمدی سامان جتا جتائیں افریقی ملک آناں روان دیگ بوت کنت۔ آئی ءَ گوشت کہ مارا یک کانودی فریم ورک ءِ جوڑ کنگ لوٹ ائیت ایش سرمایہ کار آناں ھیل کاری دنت ءُ ایش کہ آ آوانی ماڑی آنی ھک آناں ھم برجا دار ائیت۔
آئی ءَ گوشتکہ ایتھوپیا ءُ پاکستان وانگ ءُ زانگی کمک آناں ودینت کناں ءُ آوانی مشن زانشتی شیئرنگ ءَ را بندات کنگ ءَ وتی کرد ءَ پیلو کنگ چیا کہ ایشی ءَ چہ ورنا آنی کار رپک ءَ را دیمروئی رس اِت کنت۔ ایتھوپیا ءِ سفیر ءَ پاکستان ءَ سیلاپ ءَ چہ گران بھائیں بنی آدمی جانی تاوان بار آنی پد ءَ جھلانکیں ڈکھ ءُ اپسوزی ءِ درشان کت ءُ گوشت کہ اے سکیں ساھت ءَ سرجمیں دنگیا ءَ را پاکستان ءِ گوما ھمگام ءَ اوشتگی انت۔ ٹائیگرے ءِ جیڈھ ءَ تران کنان ءَ آئی ءَ گوش کہ ایتھوپیا سول ءُ تران ءُ ایمنی ءِ وسیلگ ءَ سیاسی گیواری کنگ لوٹ ائیت۔ ناشرکار ٹائیگر پیپلز لبریشن فرنٹ گروپ ءَ حکومتی اپیل ءَ را تاوان پجارینتگ ءُ نہ وشیں جنگ ءَ را دوارگ بندات کگ۔ سفیر ءَ گوشت کہ ایتھوپیا ءِ حکومت ءِ اے کانودی زمہ واری انت کہ آ وتی شہری الس آنی دیمپانی بہ کنت۔ آئی ءَ گوشت کہ میاں اوستمانی برات آنی سر ءَ زور پر دات کہ آ ٹائیگر پیپلز لبریشن فرنٹ ءِ افریقن یونین ءِ سروکی ءَ ایمنیں سول تران جاڑی داگ ءِ واستہ زور پر بہ دنت۔
