صدر مملکت ڈاکٹر عارف علوی نا چین نا صوبہ سیچوان اٹی زمی جمب آن جانی و مالی نسخان آ است ہسونی نا درشان

اسلام آباد۔ 07 ستمبر (اے پی پی) صدر مملکت ڈاکٹر عارف علوی چین نا سویل دیکی صوبہ سیچوان اٹی زمی جمب اٹی نہادی جانی و مالی نسخان آ چینی سرکڑدہ غاتون است ہسونی نا درشانی ءِ کرسا پارینے کہ مشکل نا داساہت اٹی پاکستانی حکومت و الس چین نا حکومت و الس تون تفوک ءِ۔ چین ساڑی آ نوکاپ تون اوار ہر مشکل وخت اٹی پاکستان تون تفینے۔ چارشنبے نادے آ ایوان صدر آن جاری بیان نا رداٹ تینا ہڑزخواہی کلہو اٹی صدر مملکت ڈاکٹر عارف علوی پارے کہ چین نا صوبہ سیچوان اٹی تباہ کن زمی جمب نا بنگٹ بھاز است ہسونی مس، زمی جمب اٹی نہادی جان زیانک مسر و ملکیت آک بھس مسر، پاکستانی الس و تینا کنڈآن چینی سرکڑدہ غاتون دلی ہڑزخواہی و سیچوان نا الس تون ہمدردی نا درشانی ءِ کیوہ۔ صدر مملکت غٹ ٹھپی تے زوت دراخ جوڑی نا دعا کرینے۔ اواومیت ظاہر کرے کہ بے گواہ بندغ آک زوت آن زوت تینا خاہوت آتون ملرہ، صدر مملکت داہم اومیت ظاہر کرے کہ زمی جمب زدہ علاقہ غاتا مخلوق زوت تینا اُراتے دُوارہ تفسا ہڑدے ئی زند انا بناءِ کیرہ، ڈاکٹر عارف علوی پارے کہ اودے پورو یخین ءِ کہ چینی سرکڑدہ و الس تینا پک کروک لائخی و استقلال اتون دا قدرتی آفت آن ودی مروک آ حالیت آتون مون تننگ نا پورو لائخی تخک، اوپارے کہ مشکل نا داساہت اٹی پاکستانی الس و حکومت پاکستان چینی الس و حکومت چین تون سلوک ءِ، چینی الس ہم پاکستانی نوکاپ نا زہمی تتون سلیس، مستین اٹی ہم چینی الس و حکومت قدرتی و ایلو آفت آتیٹی ننتون سلیسونے۔