ڈیرہ اسماعیل خان۔ 07 ستمبر (اے پی پی) وزیراعظم محمد شہباز شریف پارینے کہ نوکاپ آن زہمی علاقہ غاتیٹی بحالی و تعمیر نو کن بھلو کچ اسے آ وسیلہ درکار مریک ولے زہمی تے ہرممکنہ وسیلہ فراوان کینہ، ٹانک اٹی 100 اُرا تیا تالان بستی نا اِرا ہفتہ غان پد بناءِ کینہ، اُراتا تفنگ کن نغد زر تننگ یا اُرا تفسا تننگ آ سجفنگ اُن، پِر تا سوب آن نوکاپ نا نسخان تیان بچنگ کن چنکو ڈیم تفوئی مریک۔ دیرپا ڈٹ جوڑ کروئی مریک، زہمی تا امداد ءِ شفاف وڑاٹ اوفتسکان سرکینہ و داڑآ ہچ ءُ سمجھوتہ اس کپنہ۔ وزیراعظم چارشنبے نادے آ ڈیرہ اسماعیل خان نا نوکاپ آن زہمی سگو پول انا دورہ ءِ کرے۔ داوخت آ وزیراعظم ءِ ٹریفک نا بحالی و ایلو کمکی سرجز آتیا حوال تننگا، وزیراعظم ءِ پاننگا کہ سڑک و پول آتا بحالی کن این ایچ اے دے و نن کاریم کرے۔ نوکاپ زہمی تا کمک کن غٹ ادارہ غاک اواری اٹ کاریم کننگ اٹی ءُ۔ داوخت آ مولانا فضل الرحمان ، وزیر مواصلات مولانا اسعد محمود، انجینئر امیر مقام ئسک ہم ساڑی ئسر۔ سگوپول انا دورہ نا وخت آ گپ وتران کرسا وزیراعظم پارے کہ ای اسہ وار ولدا مصیبت نا داساہت اٹی حالیت آتا جاچ ءِ ہلنگ کن نمتون ساڑی مسونٹ۔ تدوک آ وار ٹانک و ڈیرہ غا بسوسٹ تو ہمووخت آ دا علاقہ غاک ساڑی آ پِر تا بھسکاری آن اولیکو ریلہ غان مشکل اسے اٹ پیش تمارہ۔ تینا رفیق آتون ہنسا زہمی تے تسلی تسوسن کہ داوخت مشکل وخت و قدرتی آفت ءِ ولے اللہ نا کمک اٹ بنجائی و صوبائی حکومت آک، ادارہ غاک و پاکستان نا فوج اواری اٹ پسندناپسند و سیاست آن ایڑتر مرسا علاقہ نا خذمت کن کاریم کیرہ۔ اوپارے کہ مولانا فضل الرحمان ، اسعد محمود و امیر مقام تون اوار صوبائی سرکڑدہ غاتے خراج تحسین پیش کینہ ہرافک تینا وس انا رداٹ پبی کاریم کریر۔ پاکستان نا فوج انا منت واری ءِ ہرفنہ ہرا ہر جاگہ غا زہمی تے کمک فراوان کرے و تینا کچ آن زیات دے و نن انسانیت نا خذمت ءِ کننگ اٹی ءِ۔ اوپارے کہ قمبر شہداد کوٹ و سندھ انا ایلو زہمی علاقہ غاتیٹی ہراتسکان ہُریس دیر سلوک ءِ، بلوچستان، خیبرپختونخوا ٹی بھسکاری مسنے۔ سوات اٹی دریانا تہہ ٹی تفنگ بھلو غلطی اس ئسک، ہموڑے نوکاپی ریلہ بھسکاری کرے۔ لوئر کوہستان اٹی 5 بندغ 5 گھنٹہ اسکان تندو ترند ریسہ غاتیٹی سلوک ئسر و دنیا ءِ الار۔ اوپارے کہ غذر اٹی خلق صفحہ ہستی آن چٹا۔ اسہ خاہوت نا 8 بندغ زوال کریر۔ اسہ چناس و اونا خاہوت نا معذور بندغ اس زندہ بچار، اوفتے باور کرفینن کہ اوفتا ہرممکن کمک ءِ کینہ۔ ہموجاگہ نا ہندی مخلوق آن ہم اومیت ءِ اوفتا خیال ءِ تخرہ۔ اوپارے کہ داکان مست پاکستان اٹی داکان زیات بھسکاری خنتنون۔ تدوک آ حکومت وسیلہ غاتے برباد کرے، ننے سیاست ءِ اسہ کنڈآ تخسا خذمت کروئی ءِ۔ بنجاٹی حکومت مخلوط ءِ ۔ داحکومت اول 28 ارب روپئی زہمی اُراتیکن جتا کرے۔ 25 ہزار روپئی فی خاہوت ءِ تننگ انگ ءِ۔ دافتے ٹی 20 ارب روپئی شفاف وڑاٹ بی آئی ایس پی نا کمک اٹ بشخنگانے۔ نوکاپ نا بھسکاری تا ودنگ آن راستکی تا بنداو آ کساس داسہ 70 ارب روپئی اسکان سرمسنے۔ دامالی بھاریم ءِ بنجائی حکومت سگنگ ءِ ایلو خڑچ آک داکان بیدس ءُ۔ داکان بیدس زوال کروک آتیکن 10، 10 لکھ فی کس تننگ اُن۔ سندھ و ایلو زہمی علاقہ غاتیٹی لکھ آ ایکڑسلوک فصل آک بھس مسنو۔ بنجائی حکومت ہر چار آ صوبہ، گلگت بلتستان و آزاد کشمیر اٹی زہمی تیکن دا وسیلہ غاتے فراوان کننگ اٹی ءِ۔ صوبہ غاک ہم تینا وسیلہ غاتیان تننگ اٹی ءُ۔ اوفتے ہم پین وسیلہ فراوان کننگ نا گرج ءِ۔ وزیراعظم پارے کہ این ڈی ایم اے نا کمک اٹ 2 لکھ تمبو ہر چار آ صوبہ غاتے نسخان تا کچ انا رداٹ فراوان کینہ۔ اوپارے کہ این ایچ اے ، وزیر و سیکرٹری مواصلات زہمی شاہراہ تا بحالی کن دے و نن کاریم کننگ اٹی ءُ۔ نن دا ہرتون کہ بنجا یا صوبہ دِنا کاریم ءِ۔ نن تینا کاریم ءِ کننگ اٹی اُن۔ اوپارے کہ ہرا علاقہ غاتیٹی دیر سلوک ءِ ہموڑے دینی مرض آتا چیلنج مون تروک ءِ۔ داڑے جان جوڑی نا آسراتی تا فراوانی و زہمی علاقہ غاتیٹی تعمیر نو کن کھرب آ روپئی درکار مریک۔ دابھاز بھلو چیلنج اسے۔ سنگت ملک آتا کنڈآن امداد نا فراوانی آ اوفتا منت وار اُن۔ زہمی تے ملوک آ امداد نا اسہ اسہ پائی ءِ شفاف وڑاٹ اوفتسکان سرکینہ۔ داڑآ ہچ ءُ سمجھوتہ اس کپنہ۔ حقدار ءِ ہر حال اٹ اونا حق ءِ ترفنگک۔ وزیراعظم پارے کہ ٹانک اٹی اسہ سخی بندغ اسے نا مالی کمک اٹ 2 کمرہ غاتیا تالان 100 اُراتا 2 ہفتہ غان پد بناءِ کینہ۔ اگہ دا ڈٹ سرسہب مس تو اودے غٹ زہمی علاقہ غاتسکان ودفنہ۔ اوپارے کہ نوکاپ و پِر تیان لکھ آ اُراک بھس مسنو۔ اوفتے معاوضہ ادا کروئی ءِ۔ ولے داڑکن دا سوچ ہرفنگ انگ ءِ اُراتا تفنگ کن نغد زر تننگے یا اُرا جوڑ کرسا تننگے۔ داٹی گڑاس خدشہ ہم ارے۔ گڑاس آسانی و گڑاس مشکل ہم ارے۔ وزیراعظم پارے کہ ساڑی نوکاپ پِر انا سوب آن ءِ۔ داوخت آ پاکستان ڈیموکریٹک موومنٹ (پی ڈی ایم) نا سروک مولانا فضل الرحمان پارے کہ نن وزیراعظم نا منت واری ءِ ہرفنہ کہ دا مشکل وخت اٹی ننا دادرسی ءِ کرے و تینٹ دانگیا بس۔ این ایچ اے و ایلو ادارہ غاک دے و نن کاریم کریر ہراڑآ اوفتے خراج تحسین پیش کینہ۔
