اسلام آباد۔ 07 ستمبر (اے پی پی) وزیراعظم محمد شہباز شریف آذربائیجان نا صدر الہام حیدر علیوف تون ٹیل فون آ ہیت کرے و آذربائیجان نا کنڈآن پاکستان نا نوکاپ زہمی تیکن است انا بھلنی اٹ امداد آ اونا منت واری ءِ ہرفے۔ چارشنبے نادے آ وزیراعظم آفس نا میڈیا ونگ آن جاری بیان نا رداٹ آذربائیجان نا کنڈآن 2 ملین ڈالر نا امداد نا ذکر ءِ کرسا وزیراعظم پارے کہ پاکستان بشام اٹی ہروار آن بھاز زیات پِر تا سوب ترند انگا نوکاپ نا مون اٹی ءِ، ہراٹی بھلو کچ اسے آ جانی نسخان اتون اوار اوار مخلوق نا ذریعہ معاش و انفراسٹرکچر ءِ بھاز نسخان رسینگانے۔ داٹی زہمی مخلوق ءِ امداد نا فراوانی و اوفتے رکھوک ہند آتیا گدریفنگ نا کارروائیک بھاز محدود مسنو۔ وزیراعظم توانائی تون اوار چندی بشخ آتیٹی آذربائیجان تون پاکستان نا کمکاری ءِ پین گہرا و گیشتر کننگ نا تینا پکا عزم انا درشانی ءِ کرے۔ پاکستان و آذربائیجان اقوام متحدہ، او آئی سی و ای سی او کون آ جہانی فورم تیا اسہ ایلو نا مخ تفی ءِ کیرہ۔ آذربائیجان او آئی سی نا رابطہ ٹولی جموں و کشمیر نا اسہ اہم ءُ باسک اسے۔ ہڑتوم آ ملک آتا الس دینی و دودوربیدگی تعلقداری و تاریخی رشتہ غاتیٹی تفوک ءُ۔
