اسلام آباد۔ 07 ستمبر (اے پی پی) ملک اٹی ساڑی آ پِر و نوکاپ آن مروک آ مرک آتا جم کچ 1343 مس، 12 ہزار 720 بندغ ٹھپی مسر، مچ آ ملک اٹی 11 لکھ 32 ہزار 572 اُراتے جزوی نسخان رسینگا وخت اس کہ 5 لکھ 60 ہزار 789 ہند پورو وڑاٹ بھس مسنو۔ نیشنل ڈیزاسٹر مینجمنٹ اتھارٹی نا (این ڈی ایم اے ) نا کنڈآن ساڑی آ پِر و نوکاپ آن مروک آ جانی و مالی نسخان نا بارواٹی جاری کروک تازہ رپورٹ نا رداٹ بشام نا پِر و نوکاپ آن پین 18 بندغ زند آن دوتے سلانو، تدوک آ بیست ءُ چار گھنٹہ ٹی سندھ اٹی 14 پنجاب اٹی 2 ، آزاد کشمیر و خیبرپختونخوا ٹی اسہ اسہ بندغ زوال کرینو۔ داوخت آ ٹھپی بندغ آتا کل کچ 17 ریکارڈ کننگا۔ ساڑی آ پِر و نوکاپ آن مچ آ ملک اٹی داتم اسکان جم وڑاٹ 1343 بندغ زوال کرینو، سندھ اٹی 536 کے پی ٹی 290 بندغ زوال کرینو۔ بلوچستان اٹی 260، پنجاب اٹی 191 و کشمیر اٹی 43 بندغ زوال کرینو۔ رپورٹ نا رداٹ مچ آ ملک اٹی 591 نرینہ، 69 زالبول و 474 چنازند آن دوتے سلانو۔ رپورٹ اٹی مستی پاننگانے کہ مچ آ ملک اٹی 14 جون آن داتم اسکان کل 12 ہزار 720 بندغ ٹھپی مسنو۔ سندھ اٹی ٹھپی مروک آتا کچ غٹ آن زیات 8321 بندغ رپورٹ مس۔ پنجاب3858 ، کے پی 361 وخت اس کہ بلوچستان اٹی 164 بندغ ٹھپی مسنو۔ رپورٹ نا رداٹ تدوک آ بیست ءُ چار گھنٹہ ٹی پنجاب اٹی 766 و سندھ اٹی 78 کلومیٹر سڑک ءِ نسخان رسینگا، مچ آملک اٹی کل 6579 کلومیٹر سڑک ساڑی آ پِر و نوکاپ آن زہمی مسنو۔ داکان بیدس بیست ءُ چار گھنٹہ ٹی پین 5356 اُراتے نسخان رسینگا۔ مچ آ ملک اٹی 11 لکھ 32 ہزار 572 اُراتے جزوی وڑاٹ نسخان رسینگا۔ ساڑی آ پِر و نوکاپ آن کل 5 لکھ 60 ہزار 789 اُراپورو بھس مسنو۔ رپورٹ نا رداٹ مچ آملک اٹی 81 ضلع ساڑی آ پِر و نوکاپ آن داسکان زہمی ءُ۔ زہمی علاقہ غاتیٹی پِر و نوکاپ تون منسلک چندی واقعہ غاتیٹی 7 لکھ 51 ہزار 145 ساہدار تے نسخان رسینگانے۔
