پشاور۔ 07 ستمبر (اے پی پی) جمعیت علمائے اسلام (ف) نا مرکزی امیر مولانا فضل الرحمان وزیراعظم محمد شہباز شریف نا خیبرپختونخوا نا نوکاپ زدہ علاقہ غاتیٹی ریسکیو و بحالی نا کاریم تا ذاتی وڑاٹ چاروکی ءِ کننگ نا ستاءِ کرسا پارے کہ اختہ شیڈول آن پد ہم وزیراعظم نوکاپ آن زہمی ضلع ڈی آئی خان نا ارٹ میکو دورہ ءِ کرینے و ریلیف و ریسکیو آپریشن تا چاروکی ءِ کرینے۔ داخیال آتا درشانی ءِ او وزیراعظم نا دورہ ڈی آئی خان نا وخت آ تعمیر نو و بحالی نا کارروائی تا بابت اڈ ہلوک دود آن تران کرسا کرے۔ مولانا فضل الرحمان حکومتی محکمہ و سیاسی جماعت آتا کمکی تنظیم تا ستاءِ کرسا پارے کہ نوکاپ زدگان تے کنوئی آ گڑاتتون اوار اوار نغدی امداد ہم فراوان کننگا و سگو پول ءِ دیر دننگ آن پد اختہ مخلوق ءِ ریسکیو کننگا۔ اودا غٹ نوکاپ زہمی تے تمبو تا فراوانی تون اوار غٹ المی آ گڑا فراوان کننگ آ زور شاغا۔ ڈی آئی خان اٹی نوکاپ نا مون ءِ توننگ کن چنکا ڈیم تا تفنگ المی ءِ۔ اوپارے کہ ٹانک زم و نواب حیدر و ایلو ڈیم تا تفنگ آن کوہ سلیمان و ایلو علاقہ غاتیٹی نوکاپ نا مون ءِ توننگ اٹ کمک رسینگک و ڈی آئی خان ءِ نوکاپ آن بچفنگ مریک۔ اوپارے کہ ڈی آئی خان اٹی نسخان نا جاچ ءِ ہلنگ نا سروے و اونا رپورٹ ءِ زوت ہی حکومت ءِ سجفنگ کن پیش کننگک۔ دود اٹی بنجائی وزیر مواصلات و پوسٹل سروسز مولانا اسعد محمود و وزیراعظم نا سلاہکار سیاسی و السی امور انجینئر امیر مقام ئسک ہم ساڑی ئسر۔ جے یو آئی (ف) نا سروک وزیراعظم ءِ ڈی آئی خان اٹی نوکاپ نا بھسکاری و بحالی نا کاریم تیان معلومدار ہم کرے۔
