نوکاپی حالیت آتیان ملک ءِ مون تروک چیلنج آتا اواری اٹ مقابلہ ءِ کینہ، احسن اقبال

اسلام آباد۔ 07 ستمبر (اے پی پی) بنجائی وزیر ڈٹ بندی ، شونداری، اصلاحات و خصوصی گام گیج پروفیسر احسن اقبال پارینے کہ نوکاپی حالیت آتیان ملک ءِ مون تروک چیلنج آتا اواری اٹ مقابلہ ءِ کینہ، مچ آ قوم آفت نا مقابلہ ءِ کننگ کن کمربستہ ءِ، نوکاپ زدہ علاقہ غاتیٹی دیر آن ودی مروک آ ناجوڑی تا تالان مننگ نا گڑتی ءِ۔ داخیال آتا درشانی ءِ او چارشنبے نادے آ این ایف آر سی سی نا دیوان نا کماشی ءِ کرسا پارے۔ دیوان اٹی چیئرمین این ڈی ایم اے و نیشنل کوآرڈنیٹر این ایف آر سی سی ہم ساڑی ئسر۔ داوخت آ بنجائی وزیر پارے کہ نوکاپی حالیت آتیان ملک ءِ مون تروک چیلنج آتا اواری اٹ مقابلہ ءِ کینہ۔ مچ آ قوم آفت نا مقابلہءِ کننگ کن کمربستہ ءِ، نوکاپ زدہ علاقہ غاتیٹی دیر آن ودی مروک آ ناجوڑی تا تالانی نا گڑتی ءِ۔ بنجائی وزیر پارے کہ جان جوڑی نا حالیت آتیا سخت نظر تخنگے و ناجوڑی تیان بچنگ کن ہلہلہ ئی گام گیج کننگے، زہمی تا بحالی و نوکاپی حالیت آتیان مروک آ نسخان تا پوروی کن سروے ءِ ترند کننگے، سہی حساب وکتاب ڈیش بورڈ انا کمک اٹ کمکار مریک۔ اوپارے کہ این جی اوز و آئی این جی اوز ءِ کمکی کارروائی تیٹی اوار کننگ کن متحرک کننگے، الس ءِ کمکی کیمپ آتا بابت پورو معلومداری فراوان کننگے، ڈیم و ایلو آبی وسیلہ غاتیٹی دیر انا کچ آ نظر تخنگے۔