زرگزران ءِ پائیدار و سوگو بنداو تیا اتنگ کن مشکل ءُ فیصلہ کرین، بروک آ تُوتیٹی ملک اٹی کبینی ٹی کمتی بریک، وزیر خزانہ مفتاح اسماعیل

اسلام آباد۔ 07 ستمبر (اے پی پی) بنجائی وزیر خزانہ و محصولات مفتاح اسماعیل پارینے کہ ساڑی حکومت زرگزران ءِ پائیدار و سوگو بنداو تیا اتنگ کن مشکل ءُ فیصلہ کرین، مسکوہی حکومت ٹرانسمیشن و ڈسٹری بیوشن نیٹ ورک آ کاریم کریکہ تو بجلی نا نہاد آتیٹی ودکی متوکہ، بروک آ تُو تیٹی ملک اٹی کبینی ٹی کمتی بریک ۔ چارشنبے نادے آ داڑے اسہ دود اسے آن تران کرسا وزیرخزانہ مفتاح اسماعیل پارے کہ اپریل اٹی ننتون یک و نیم تُو درآمد آتیکن زرمبادلہ نا کوڑی ئسک ، مالیاتی ادارہ غاک ہمو ملک آتے وام ایترہ ہرافتے تون کم آن کم مسہ تُو انا زرمبادلہ نا کوڑی مرے۔ ساڑی حکومت زرگزران ءِ پائیدار و سوگو بنداوتیا اتنگ کن مشکل ءُ فیصلہ ہلک، وزیر خزانہ پارے کہ ہراتم ہم 4 درسد آن زیات گروتھ مسنے داڑآن حسابات جاریہ نا کھاتہ غاتا نسخان ودک، انتئے کہ گروتھ تون طلب اٹی ودکی مریک ہراڑآن ننا درآمد ہم ودک۔ زرگزران نا حالیت آتا رداٹ حکومت پرتعیش گڑاتا دوئی آ پابندی عائد کرے، نن  بے گرج میوہ، خور انا گڑا و لگژری گاڈی تا درآمد آ پابندی خلکونے۔ نن خوانہ کہ ننا درآمد ملک اٹی بروک آ ترسیلات زر انا بریبر مرے۔ وزیرخزانہ پارے کہ برآمد آتیٹی ودکی کن گام گیج کننگ انگ ءِ، ملک اٹی برآمد کروک آک برآمد آتا بابت آسودہی تو خوارہ ولے ہمو کچ اٹ برآمد مفک۔ ننا حکومت برآمد آتیٹی ودکی کن آسراتی و ترغیب تننگ ءِ۔ وزیرخزانہ پارے کہ ساڑی آ پِر و نوکاپ آن ملک اٹی بھلو کچ اسے آ نسخان مسنے، نوکاپ آن کرپاس نا فصل ءِ نسخان مسنے، ہنداوڑ پیماز، ٹماٹر، گنڈیری و بورہ نا فیصل آک ہم بھس مسنو۔ حکومت سوزی تا نہاد آتیٹی ودکی ءِ توننگ کن اونا درآمد آ خراج آتیٹی رعایت تسنے، داوخت آ اوغانستان و چین آن سوزی بننگ ءِ ولے ظاہر ءِ کہ داڑآ ہم ننا زرمبادلہ خڑچ مننگ ءِ، زرمبادلہ نا بچت کن حکومت پرتعیش گڑاتا درآمد آ پابندی خلکوسس۔