نوکاپ نازہمی تا بحالی کن خذمت نا عمل اٹی لگوک اُن، امیر جماعت اسلامی بلوچستان

نوشکی۔ 07 ستمبر (اے پی پی) جماعت اسلامی بلوچستان نا صوبائی امیر مولانا عبدالحق ہاشمی نوشکی نوکاپ زدہ علاقہ قادر آباد و کلی مینگل نا دورہ ءِ کرے، داوخت آ امیر ضلع حافظ مطیع الرحمان ، نائب امیر مولانا محمد قاسم ، آغا نورالحق شاہ جی عبیداللہ مینگل، محمد یعقوب آغا قادر شاہ و ایلوفک ہم ساڑی ئسر۔ اونوکاپ زدگان تیان تران کرسا پارے کہ ساڑی آ نوکاپ آن بھلو کچ اسے آ نسخان مسنے، نن تینا نوکاپ زدہ ایلم تا ڈکھیائی و مشکل اٹی اوفتے تون تفوک اُن و ایمرجنسی نا وڑاٹ ننتون انت امداد اس ئسک نن بے پرخ بشخنگ اُن۔ اوپارے کہ نوکاپ زہمی تا بحالی کن خذمت نا عمل اٹی لگوک اُن، جماعت اسلامی  تون اقتدار اف ولے نن نمے کن سخی تا مون آ جھولی اس تالان کینہ  او انت اس ایترہ نن اوفتے نمے اسکان سرکینہ، جماعت اسلامی دُن ءُ ہچ ءُ قول اس کپک ہراڑآ عمل کننگ کپ۔ ساڑی آ نوکاپ آن مروک آ بھسکاری آن پد حکومت ، جماعت اسلامی، الخدمت فاؤنڈیشن تنیا بحالی نا عمل ءِ پورو کننگ کپسہ ہنداخاطرآن غٹ اواری اٹ نوکاپ زہمی تا کمک ءِ  بایدے کیر، نن تینا وس انا رداٹ خذمت نا عمل اٹی لگوک اُن۔ بلوچستان اٹی شش ضلع ہرا بولان آن ہلیس اوستہ محمد، جھل مگسی و جعفر آباد اسکان ہر چار مہ کنڈآن نوکاپی دیر اٹی ءُ ، الخدمت فاؤنڈیشن ہموڑے امداد کننگ اٹ اختہ ءِ ہندن ہموکان فارغ مریک نوشکی ٹی خذمت و امداد نا بناءِ کیک۔