اسلام آباد۔ 06 ستمبر (اے پی پی) وزیراعظم محمد شہباز شریف 6 ستمبر نا شہید آتے خراج عقیدت پیش کرسا پارینے کہ ننا نرزور فوج تینا عقیدہ و پکا ارادہ اٹ اینو آن 57 سال مست نن نا تہاری ٹی پاک گل زمین آ جلہو کروک آ تینے آن وسیلہ و کچ اٹی چار گناود دشمن نا عزم ءِ مش تا کرے، مچ آ قوم ہمو شہید و غازی تے سلام پیش کیک، اینو ستمبر اٹی اسہ وار ولدا قوم تینا نوکاپ زہمی تا کمک کن ہموجوزہ اٹ یک جان و اِرا است جوڑ ءُ۔ سے شنبے نادے آ وزیراعظم پاک فوج انا نرزور گل زادہ غاتے خراج تحسین پیش کننگ کن بنجائی دارالحکومت اٹی واقع پاکستان مانومنٹ اٹی یات گار شہداء آ پھل آتا چادر اس شاغنگ آن پد گپ وتران کرسا پارے کہ مچ آ قوم اینو تینا شہید و غازی تے سلام پیش کننگ ءِ، ہرافک اینو آن 57 سال مست پاکستان آ نن نا تہاری ٹی دشمن نا لغوری جلہو آ لاالہ الا اللہ ءِ خوانسا دشمن نا دیوانہ وار مقابلہ ءِ کریر و تینا دتر اٹ پاکستان نا سیم تا رکھ ءِ کریر۔ اوپارے کہ ننا ہمو شہید و غازیک تینا جون تے ندر کرسا دشمن نا مکاری جلہو آن ارض وطن پاکستان ءِ بچفیر، دھرتی نا اسہ اسہ انچ انا تینا جان آن زیات رکھ ءِ کریر، دشمن نا دنان تے پرغار۔ وزیراعظم پارے کہ اینو ولدا نوکاپ آن زہمی بندغ آتا کمک کن مچ آ قوم یکجان و اِرا است ءُ ، نئے کس اس پنجابی، نئے سندھی ، نئے پٹھان ، نئے بلوچی ، نئے بلتی و نئے کشمیری اسے بلکن مسلمان و پاکستانی آنبار اسہ لڑی اسے ٹی ءُ، دا پِر و نوکاپ نا دے ونن مقابلہ ءِ کننگ ءُ۔ اوپارے کہ پاکستان نا تاریخ اٹی داخہ بھلو و تباہ کن نوکاپ خنتنون ، مچ آ قوم، بنجائی و صوبائی حکومت آک، سلہہ بند فوج و الس اواری اٹ دانا مقابلہ ءِ کننگ اٹی ءُ، ڈکھیاانسانیت نا دوتے ہلنگ ءُ، پاک فوج انا آفیسر و ورناک داوخت آ تینا جون تے ندر کرینو۔ زہمی تے رکھوک ہند آ گدریفنگ کن دے ونن ءِ اسٹ کرینو۔ وزیراعظم پارے کہ اینو نا دے او میجر عزیز بھٹی شہید، میجر شبیر شریف شہید، سکوارڈن لیڈر سرفرازاحمد رفیقی شہید، میجر محمد ضیاء الدین عباسی شہید تون اوار ہر ہمو شہید و غازی ءِ سلام پیش کیک ہرافک تینا جان تا پرواہ ءِ کپرسا وطن نا کنڈ کنڈ انا دفاع ءِ کریر۔ قربانی تا دا عظیم داستان مدام یات تخنگک۔ اوپارے کہ اللہ نا کمک و نصرت اٹ پاکستان دنیا ٹی تینا گوہوک آ ہند ءِ دوئی کیک
