اسلام آباد۔ 06 ستمبر (اے پی پی) وزیراعظم محمد شہباز شریف پارینے کہ قوم ملکی دفاع و سالمیت کن تینا جون تے ندر کروک آ شہید آتے سلام پیش کیک ہرافک 6 ستمبر 1965 آ تینے آن چار گنا ود دشمن نا ناپاک عزم ءِ بے سہب کریر، قوم ءِ تاریخ نا بدترین نوکاپ نا حالیت اٹی اینو ولدا اسہ بھلو چیلنج اس مون تروک ءِ، قومی سیوت و یکجہتی اٹ دانا مقابلہ ءِ کینہ۔ سے شنبے نادے آ بنجائی کابینہ نا دیوان آن تران کرسا وزیراعظم پارے کہ اینو قوم یوم دفاع ءِ اسہ ہندن ءُ وخت اسے ٹی اڈتننگ ءِ ہراتم ملک ءِ بدترین نوکاپ مون تروک ءِ۔ یوم دفاع ننے 57 سال مست دادے انا یات ترفک ہراتم نن مکار دشمن نن نا تہاری ٹی پاکستان آ جلہو کرے ولے ننا نرزور فوج انا آفیسر، ورناو سپاہیک لاالہ الا اللہ نا ورد ءِ کرسا تینا جون تے ندر کرسا دشمن نا ناپاک عزم ءِ بے سہب کریر۔ وزیراعظم پارے کہ نئے بیرہ مچ آ پاکستانی قوم بلکن ننا بروک آ چین و ننا چناک داشہید و غازی تے مدام یات تخرہ۔ وزیراعظم پارے کہ اینو نادے ننے داہیت انا ہم احساس ترفک کہ ہراتم قوم اسٹ مرے و رنگ و نسل و قومیت آن ایڑتر مرسا یکجا مرے تو بھلن آن بھلن مشکل و چیلنج تون ہم مون تننگ مریک۔ اوپارے کہ ننا جوزہ غان پُر ورناک دشمن نا ناپاک عزم انا مون آ سوگو ءُ دیوال اس مسر و فضاتیا تالان مسر۔ ننا بری، بحری و فضائی فوج تینے آن 4 گنا زیات فوج ءِ چٹ کریر، اینو ولدا پاکستانی قوم ءِ اسہ بھلو چیلنج اس مون تروک ءِ۔ مہران نا دامان تیان ہلیس بلوچستان نا سنگلاخ مش، خیبرپختونخوا نا برف پوش مش، سویلی پنجاب نا میدان و گلگت بلتستان و آزاد کشمیر اسکان ہر جاگہ غا نوکاپی دیرک تاریخ نا بدترین بھسکاری اس کرینو۔ درو ای قمبر شہداد کوٹ آ ہناسٹ ہراڑے ہزار آ خلق دیر اٹی ڈبنگانو۔ ہر کنڈآ تالان دیر سمندر نا ندارہ ءِ پیش کیک۔ لکھ آ اُراک بھس مسنو۔ 1300 بندغ نوکاپ اٹی زوال کرینو ہرافتے ٹی سد آ چناک ہم اوار ءُ وخت اس کہ ہزار آ مخلوق ٹھپی و لکھ آ ساہدار تے دیر درینے، لکھ ایکڑ آ سلوک فصل آک بھس مسنو۔ سندھ آن پد بلوچستان اٹی غٹ آن زیات بھسکاری مسنے۔ سوات، سویلی پنجاب تون اوار مچ آ ملک اٹی 3 کروڑ آن زیات پاکستانی نوکاپ نا مون اٹی ءُ و ہرجاگہ غا دیر زند ءِ ژند کرینے۔ داحالیت آتیٹی اینو ولدا قوم ہمو جوزہ و حوصلہ غان سرشار ءِ ہرانا درشانی ءِ او 1965 اٹی کریسر۔ خواری کش، بزغر، طالب علم ، مزور ، سندھی ، بلوچی، پنجابی، پٹھان غٹ اسہ جون مرسا پوسکن ءُ تاریخ اس نوشتہ کننگ ءُ۔ وزیراعظم پارے کہ لسبیلہ ٹی ننا آفیسر وورناک شہیدی ناجام ءِ نوش کریر۔ غذر اٹی اسہ ہی خاہوت نا 8 بندغ ءِ دیر درے و بیرہ اسہ بزرگ و اونا معذور چناس پین سلیس۔ داوڑنا داستان ہرجاگہ غا تالان ءِ ولے مچ آ قوم اسہ وار ولدا یکجا مسنے۔ وزیراعظم لمہ وطن نا دفاع کن قربانی تروک آ شہید و غازی تے خراج عقیدت پیش کرے و پارے کہ مچ آ قوم اوفتے سلام پیش کیک ہرافک تینا جون تے ندر کرسا چار گنابھلا دشمن ءِ شکست تسر ، اوفتا دا قربانی زیان مفک۔
