راولپنڈی۔ 06 ستمبر (اے پی پی) پاک فوج انا سروک جنر ل قمر جاوید باجوہ تون شیلا جیکسن لی نا کماشی ٹی ڈل اوڑدہی کرے ہراٹی علاقائی حالیت و چندی بشخ آتیٹی ہڑتوم آ کنڈآتا تعلقداری آ گپ وتران مس، امریکی ڈل نوکاپ آن مروک آ بھسکاری تیا تینا است ہسونی نا درشانی ءِ ہم کرے۔ آئی ایس پی آرنا رداٹ جی ایچ کیو راولپنڈی ٹی آرمی چیف جنرل قمر جاوید باجوہ تون امریکی ڈل شیلا جیکسن لی نا کماشی ٹی اوڑدہی کروک آ ڈل اٹی تھامس سوزی، الیگزینڈراین گرین ہم اوار ئسر۔ اوڑدہی ٹی علاقائی سلامتی نا حالیت و چندی بشخ آتیٹی ہڑتوم آ کنڈآتا کمکاری آ گپ وتران کننگا۔ ڈل پاکستان اٹی نوکاپ آن مروک آ گیشتر بھسکاری آ تینا است ہسونی نا درشانی ءِ کرے و مشکل ساہت اٹی نوکاپ زہمی تا پبی کمک نا سلہ ہم خلک۔ امریکی ڈل علاقائی سوگوی کن پاکستان نا کوشست آتا ستاءِ کرے و ہڑتوم آ کنڈآتا کمکاری ءِ ودفنگ کن کڑد ادا کننگ نا عزم انا درشانی ءِ کرے، آرمی چیف امریکی ڈل انا مخ تفی آ منت واری ءِ ہرفسا پارے کہ جہانی شریدار آتا کمک زہمی تا بحالی ٹی اہم ثابت مریک۔ ڈل سندھ انا نوکاپ زہمی علاقہ غاتا دورہ ءِ ہم کرے۔ امریکی ڈل ءِ سندھ اٹی برجا کمکی و بحالی نا کاریم تیا حوال ہم تننگا۔
