اسلام آباد۔ 06 ستمبر (اے پی پی) پاکستان سنکیانگ اٹی انسانی حق انا بابت انسانی حق انا ہائی کمشنر نا دفتر نا رپورٹ اس جاری کننگ آ پارینے کہ پاکستان اقوام متحدہ نا اسہ زموار باسک اسے نا حیثیت اٹ کثیر الجہتی عزم اتون اقوام متحدہ نا چارٹر نا اصول آتیا یخین تخک ہراٹی سیاسی آجوئی، وتواجہی و ریاست آتا تہہ نا باندات آتیٹی نیام تمپننگ نا شرف اوار ءِ۔ دفترخارجہ نا ترجمان نا کنڈآن سے شنبے نادے آ جاری بیان اٹی پاننگانے کہ ننا دا آخبتی موقف ءِ کہ انسانی حق انا جہانی شرف ءِ مون آ دننگ کن غیر سیاسی کاری، عالمگیریت، معروضیت ، گپ و تران وتعمیری ہیت و گپ بایدے اہم عنصر مرے۔ ترجمان پارے کہ پاکستان سنکیانگ اٹی راجی وا قتصادی شونداری، ہم گرنچی و امن و سوگوی کن چین نا کوشست آتا مخ تفی ءِ کیک۔ اوپارے کہ چین تدوک آ 35 سال اٹی 700 ملین آن زیات مخلوق ءِ نیزگاری آن کشنگ اٹ سرسہبی دوئی کرینے، ہنداوڑ اوفتا حالیت زند اٹی گچینی بسنے و بنداوی انسانی حق آن فائدہ ہرفینو۔ ترجمان مستی پارے کہ نن اقوام متحدہ نا انسانی حق انا نظام تون اوار اوار او آئی سی جنرل سیکرٹریٹ تون چین انا تعمیری گپ وتران نا ستاءِ کینہ، دُن کہ انسانی حق انا مسکوہی ہائی کمشنر و او آئی سی نا ڈل انا چین انا دورہ غاتیان پاش مریک ۔ اوپارے کہ پاکستان اقوام متحدہ نا چارٹر نا اصول آتا رداٹ انسانی حق ءِ جہانی کہول آ مون آ دننگ کن تینا آخبتی عزم انا درشانی ءِ کیک۔
