چیئرمین سینیٹ نا قزاخستان نا سفیر تون اوڑدہی ٹی گپ وتران

اسلام آباد۔ 05 ستمبر (اے پی پی) چیئرمین سینیٹ محمد صادق سنجرانی پارینے کہ پاکستان و قزاخستان نا نیام اٹ گچین زرگزرانی تعلقداری آن ہڑتوم آ کنڈآتا کمکاری ءِ پین مون آ دننگ اٹ کمک رسینگک، زرگزرانی و واپاری رابطہ غاتا مون آ دننگ آن علاقائی شونداری ٹی ہم نمان پیش رفت مریک، پاکستان و قزاخستان مدام جہانی و علاقائی امور آ اسہ وڑ موقف اختیار کرینو۔ دوشنبے نادے آ سینیٹ سیکرٹریٹ آن جاری بیان نا رداٹ داخیال آتا درشانی ءِ او قزاخستان نا سفیر یرژان کسٹافن تون گپ وتران اٹی کرے ہرا پارلیمنٹ ہاؤس اٹی اوڑتون اوڑدہی کرے۔ اوڑدہی ٹی تین پہ تینی است خواہی نا امور تون اوار ہڑتوم آ کنڈآتا کمکاری ، پارلیمانی و واپاری کہول آ ڈل آتا ہن و بر اٹی ترندی اتنگ و اہم امور آ گپ وتران کننگا۔ محمد صادق سنجرانی قزاخستان نا سفیر ءِ پاکستان اٹی ساڑی آ پِر و نوکاپی حالیت ونسخان تا بارواٹ سرجمی اٹ معلومدار کرے۔ داوخت آ چیئرمین سینیٹ محمد صادق سنجرانی پارے کہ پاکستان و قزاخستان نا نیام اٹ گچین زرگزرانی تعلقداری آن ہڑتوم آ کنڈآتا کمکاری ءِ پین مون آ دننگ اٹ کمک رسینگک۔ زرگزرانی و واپاری رابطہ غاتا مون آ دننگ آن علاقائی شونداری ٹی ہم نمان پیش رفت مریک۔ ہڑتوم آ ملک آتا نیام اٹ برادرانہ و دوستانہ تعلقداری ننا خارجہ پالیسی تا اہم ءُ بشخ اسے۔ بڑزکوایوان اٹی قزاخستان ، پاکستان سنگتی ٹولی ساڑی ءِ۔ اوپارے کہ سنگتی ٹولی نا کمک اٹ ہڑتوم آ ملک آتا نیام اٹ پارلیمانی تعلقداری تے پین سوگو کننگ مریک۔ پاکستان و قزاخستان نا نیام اٹ جہانی فورم تا کہول آ ہم گچین تعلقداری ءِ۔ پاکستان و قزاخستان مدام جہانی و علاقائی امور  آ اسہ وڑ موقف اختیار کرینو۔ پاکستان اٹی زرکاری نا بھلو وارخواہی اس ساڑی ءِ۔ چیئرمین سینیٹ سی پیک و گوادر پاکستان نا شونداری نا ضامن ءِ۔ پارلیمانی تعلقداری تا مون آ دننگ آن زرگزرانی و اقتصادی بشخ آتیٹی کمکاری آن سوگوی بریک۔ پاکستان نیامی ایشیائی ملک آتون رابطہ کاری نا مون آ دننگ ءِ پین سوگو کننگ نا چرجوئی ٹی کوشست کننگ  ءِ۔ داوخت آ قزاخستان نا سفیر پارے کہ قزاخستان پاکستان تون تینا تعلقداری تے قدر انا نظر اٹ ہرک۔ سائنس و ٹیکنالوجی ، تعلیم و ایلو بشخ آتیٹی ہم کمکاری ءِ مون آ دننگ کن گام گیج کننگ انگ ءِ۔ پاکستان اٹی ساڑی آ پِر و نوکاپ نا سوب آن مروک آ جانی و مالی نسخان تیا است ہسونی نا درشانی ءِ کینہ۔ مشکل نا داساہت اٹی پاکستان نا حکومت و الس تون تفوک اُن۔