اسلام آباد۔ 05 ستمبر (اے پی پی) بنجائی وزیر خزانہ و محصولات ڈاکٹر مفتاح اسماعیل پارینے کہ ساڑی آ نوکاپ نا رداٹ جی ڈی پی نمو نا شرح 3.5 درسد مننگ نا گمان ءِ، نوکاپ نا رداٹ امداد و بحالی نا کاریم تیکن حکومت بجٹ اولیت آتا اول سرآن تعین ءِ کیک، وسیلہ غاتا تہہ ٹی رہینگسا رہینگ ءِ ہیل کروئی مریک، پائیدار اقتصادی نموکن بوم اینڈ بسٹ سائیکل آن پیش تمنگ المی ءِ۔ دوشنبے نادے آ درملکی میڈیا تون گپ وتران اٹی وزیر خزانہ مفتاح اسماعیل پارے کہ پاکستان اٹی ساڑی آ پِر و نوکاپ آن بھاز زیات نسخان مسنے، آبادی نا لحاظ اٹ ملک انا ارٹ میکو بھلا صوبہ اسہ جھیل اسے نا دروشم ءِ اختیار کرینے، سندھ اٹی کرپاس نا فصل پورو بھس مسنے، گنڈیری نا 25 درسد فصل ءِ نسخان رسینگانے، 10 لکھ آن زیات ساہدارک کسکنو، 10 لکھ آن زیات اُرابھس مسنو۔ سی این بی سی تون گپ وتران اٹی وزیر خزانہ پارے کہ ننا اندازہ ءِ کہ نوکاپ آن 40 ملین مخلوق زہمی مسنے ، ہرا بھسکاری مسنے اونا تصور ناممکن ءِ۔ وزیرخزانہ پارے کہ 99 درسد زہمی علاقہ غاتے بجلی نا فراوانی بحال مسنے، ٹیلی مواصلات خذمت آتا بحالی مسنے، زہمی علاقہ غاتیٹی موبائل فونک کاریم کننگ اٹی ءُ، حکومت ہمو اُراتے ، ہرافتا کماشی ءِ زالبول آک کننگ ءُ، ءِ 25 ہزار روپئی نغد امداد و کمک نا فراوانی نا چرجوئی نا بناءِ کرینے، 4.6 ملین اُرادے دا امداد فراوان کننگ انگ ءِ ، زہمی علاقہ غاتیٹی کمکی سرجزآک برجاءُ، خور انا گڑاتا نہاد آتیٹی کمتی کن حکومت دا گڑاتیا خراج آتا اِلنگ و رعایت تسنے، بنجانا کنڈآن صوبہ غاتے تمبو، کمبل ، موبائل ہسپتال و ایلو کمکی گڑاتننگانے، صوبہ ہم تینا کڑد ءِ ادا کننگ ءِ ولے ہرا بھسکاری مسنے او ننا وس آن پیشن ءِ، داوڑنا حالیت آتیٹی حکومت اخس کننگ کرے او کیک۔
