اسلام آباد۔ 05 ستمبر (اے پی پی) قومی اسمبلی نا اسپیکر راجہ پرویز اشرف پارینے کہ پاکستان موسمیاتی بدلی نا خطرہ غاتا گواچی ءِ، ساڑی آ تباہ کن طوفانی پِر و نوکاپ آن بھلو کچ اسے آ جانی و مالی نسخان مس ، کشاری ڈغار تے دیر ہرفے و غٹ بھلا فصل آک و بھلو کچ اسے ٹی ساہدارآک کسکنو، جہانی برادری داحالیت آتا رداٹ پاکستان نا کمک ءِ کے۔ داخیال آتا درشانی ءِ او علامہ اقبال اوپن یونیورسٹی نا کنڈآن ’’پائیدار شونداری و غذائی رکھ اکن موسمیاتی تغیرات کشت وکشار، پائیدار شونداری و غذائی رکھ انا سرحال آ اولیکو جہانی کانفرنس نا بنائی دیوان آن تران کرسا کرے۔ اسپیکر پارے کہ قومی اسمبلی متحرک پارلیمانی جمہوریت نا کمک اٹ چاگڑدی بدلی تا چیلنج آتے گچین وڑاٹ تالان کننگ ءِ۔ اوپارے کہ پائیدار ہزاریہ شونداری ہدف آتا دوئی کننگ کن پارلیمانی ٹاسک فوروس ایس ڈی جیز نا موسمیاتی تغیرات آتا بابت ہدف آتیا پیش رفت نا چاروکی ءِ کیک وخت اس کہ موسمیاتی بدلی آ قائمہ کمیٹی ہم دا بابت موسمیاتی تغیرات آتا بابت گام گیج آتا سرگرمی اٹ جانچ پڑتالءِ کیک۔ اسپیکر قومی اسمبلی جہانی برادری آن خواست کرے کہ او موسمیاتی تنکی تون مون تننگ کن گام گیج کے و پاکستان نا کمک کن مون آ برے انتئے کہ پاکستان دا تنکی آن غٹ آن زیات زہمی مسنے۔ اومستی پارے کہ پاکستان نا قومی اسمبلی انٹرنیشنل پارلیمانی یونین (آئی پی یو) نا کمک اٹ اسہ علاقائی سیمینار اسے نا مہمانداری ءِ کننگ ءِ ہراٹی برجا موسمیاتی تغیرات آتیا چکار کننگک و داسیمینار دنیا نا چکار ءِ ننا جانی و مالی نسخان تا کنڈآ کرفک۔
