اسلام آباد۔ 05 ستمبر (اے پی پی) امریکہ ٹی پاکستان نا سفیر مسعود خان موسمیاتی بدلی نا منفی اثر آتا سوب آن پاکستان اٹی نوکاپ ءِ اسہ بھلو بھسکاری اس گوندسا جہانی برادری آن نوکاپ زدگان تا کمک کن کوشست آتے ودفنگ آ زور شاغانے۔ فاکس نیوز نا سنڈے پروگرام ’’آن دی بل‘‘ اٹی گپ وتران کرسا اوپارے کہ نوکاپ اٹی ملک انا اسہ تہائی بشخ اس دیر اٹی ڈُبنگانے وخت اس کہ 1300 آن زیات بندغ زوال و 33 ملین بے اُرا مسنو۔ اوپارے کہ نوکاپ آن ہرا کچ آ بھسکاری مس نن اوڑکن تیار اَلونہ۔ پاکستانی سفیر پارے کہ نن مستین اٹی قدرتی آفت آتون مون تسونن ہرانا رداٹ نن اسہ اپریٹس اس تیار کریسن ہرا ساڑی آ قدرتی آفت آتیکن گنج اس متنے۔ اوپارے کہ پاکستان نا حکومت نیشنل ڈیزاسٹرمینجمنٹ اتھارٹی نا کمک اٹ نوکاپ زہمی تے امدد فراوان کننگ انگ ءِ، نوکاپ آن مروک آ نسخان ءِ مون آ تخسا پاکستان قومی ایمرجنسی نا پڑو کرینے، حکومت زہمی مخلوق اسکان انسانی امداد ءِ سرکننگ کن پبی گام گیج کننگ ءِ ۔ پاکستان نا سفیر انسانی ہمدردی نا مد اٹی 30 ملین ڈالر نا امداد آ امریکہ نا منت واری ءِ ہرفسا پارے کہ ننے امریکی سرکڑدہ و سول سوسائٹی نا کنڈآن یکجہتی و ہمدردی نا کلہو رسینگانے ہرا سفت نا قابل ءُ۔ مسعود خان پارے کہ ہوائی راہداری تا کمک اٹ ریلیف و ریسکیو کن امداد سرکننگ انگ ءِ ہراٹی خور ، پناہ گاہ ، دوائی و تمبو تا کھیپ اوار ءِ۔ اوپارے کہ ننے نوکاپ زدگان تیکن پبی امداد نا گرج ءِ تانکہ دا قدرتی آفت آن زہمی مروک آ و بے اُرا بندغ آتے ریلیف سرکننگ مرے۔ اوپارے کہ یو ایس ایڈ ہم نوکاپ آن ودی مروک آ حالیت آتا جاچ ءِ ہلنگ ءِ و بھاز انگا سخی امریکی تنظیمک ہم نوکاپ زدگان پاکستان ءِ انسانی امداد گدریفنگ ءُ۔
